كەشە استاناداعى «انا مەن بالا ۇلتتىق عىلىمي ورتالىعىندا» قازاقستان حالقى اسسامبلەياسىنىڭ قورى «شىن جۇرەكتەن» قايىرىمدىلىق تەلەمارافونى مەن ەل تاۋەلسىزدىگىنىڭ 25 جىلدىعىنا ارنالعان ءىس-شارالار اياسىندا «بايقا جولدا, بالاقاي!» اتتى تەاترلاندىرىلعان كورىنىس قويدى.
قويىلىم بارىسىندا قاھارمانداردىڭ باسىنان وتكەن قىزىقتى حيكايالار جەتكىنشەكتەرگە جول ەرەجەسى تۋرالى پايدالى ماعلۇماتتار بەردى. اراسىندا ءان مەن بيگە دە ۋاقىت تابىلىپ, كىشكەنتايلار ءبىر سەرپىلىپ قالدى.
اتالمىش ورتالىقتىڭ ديرەكتورى بەكپاي ءحايرۋليننىڭ ايتۋىنشا, مۇنداي تانىمدىق ويىن-ساۋىق ناۋقاس بالالاردىڭ كوڭىلىن كوتەرىپ, ارتىق ۋايىم-مۇڭنان ارىلتادى ءارى پسيحولوگيالىق تۇرعىدان دا ءتيىمدى ەكەن.
– اۋرۋحانادا ونكولوگيالىق سىرقاتقا شالدىققان 100-گە جۋىق ءسابي ەمدەلۋدە. ولاردىڭ تەزىرەك جازىلىپ, اياقتارىنان تۇرىپ كەتۋى ءۇشىن قولدان كەلگەن كومەكتىڭ ءبارىن جاساپ جاتىرمىز. وسى رەتتە قازاقستان حالقى اسسامبلەياسىنىڭ قورى بىزدەن ەشقاشان جاردەمىن اياعان ەمەس. جىلىنا بىرنەشە رەت سوعىپ, بالدىرعانداردى كول-كوسىر شاتتىققا كەنەلتىپ كەتەدى. ودان بولەك, ءدارى-دارمەكتەرمەن جانە زاماناۋي قۇرىلعىلارمەن قامتاماسىز ەتىپ وتىرادى, – دەدى مەكەمە باسشىسى اعىنان اقتارىلىپ.
قازاقستان حالقى اسسامبلەياسى قورى جاقىندا عانا 16 جاستاعى ىڭكار جاقىپ ەسىمدى ءجاسوسپىرىم قىزدىڭ سۇيەك كەمىگىن اۋىستىرۋ ءۇشىن رەسەيدەن دونور تاۋىپ, وپەراتسياعا قاجەتتى قارجىنى تۇگەلدەي اۋدارىپتى. ەندى قور قىزمەتكەرلەرى سول وتانىڭ ناتيجەسىن اسىعا كۇتىپ ءجۇر.
– بالانىڭ باقىتىنان اسقان نە بار ومىردە؟! تاياۋدا وسىنداعى پالاتالارعا جاپونيادان ارنايى تاپسىرىسپەن اكەلىنگەن انتيباكتەريالىق پەردە ىلدىك. ونداي جابدىق قازاقستان بويىنشا ءالى ەش جەردە ورناتىلماعان. جاڭا تەحنولوگيانىڭ كۇشىمەن جۇمىس ىستەيتىن قۇرال يممۋنيتەتى ءالسىز بۇلدىرشىندەرگە قولايلى, – دەدى قازاقستان حالقى اسسامبلەياسى قورى ديرەكتورىنىڭ ورىنباسارى تالعات بالپىشەۆ.
بوتاگوز ماراتقىزى
