جەڭىستىڭ 70 جىلدىعىنا جانە «ەكسپو-2017» كورمەسىنىڭ قۇرمەتىنە ورايلاستىرا ۇيىمداستىرىلعان «جەڭىستىڭ قايراتى – بولاشاقتىڭ قۋاتى» اتتى سۋرەتشىلەردىڭ III حالىقارالىق بايقاۋى مارەسىنە جەتتى.
استانا قالاسىنداعى ۇلى وتان سوعىسى مۇگەدەكتەرىنە ارنالعان كلينيكالىق گوسپيتال مەن ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى ۇيىمداستىرعان حالىقارالىق بايقاۋعا 14 مەملەكەتتىڭ قىلقالام شەبەرلەرى قاتىستى. مەكەمە باسشىسى ءادىلحان ءابدۋليننىڭ ايتۋىنشا, رەسەي, ۋكراينا, قىتاي, مونعوليا, وزبەكستان, قىرعىزستان سەكىلدى ەلدەردەن ءوتىنىم كوپ تۇسكەن. ولار ءوز تۋىندىلارىندا اسكەري-پاتريوتتىق, ۇرپاقتار ساباقتاستىعى جانە «ەكسپو-2017» كورمەسى شەڭبەرىندە قازاقستاننىڭ قازىرگى جەتىستىكتەرىن پاش ەتكەن.
– ۇلتتىق سۋرەت گالەرەياسىندا ىلىنگەن بارلىق قاتىسۋشىلاردىڭ ەڭبەكتەرى كاسىبي دەڭگەيدە ورىندالعان. تانىمال كاسىبي سۋرەتشىلەر مەن قوعام وكىلدەرىنەن قۇرالعان كونكۋرستىق كوميسسيا جەڭىمپازداردى انىقتادى. بۇگىنگى سۋرەت كورمەسىندە كارتينالاردىڭ بارلىعى حالىققا ۇسىنىلىپ وتىر. جالپى, قاتارىنان بىرنەشە مارتە وسىنداي حالىقارالىق دەڭگەيدە كونكۋرس ۇيىمداستىرعان گوسپيتال ۇجىمىنا ريزاشىلىعىمىزدى بىلدىرەمىز. بايقاۋعا ارناپ سالعان ءوزىمنىڭ ەڭبەگىمدى اتالمىش مەكەمەگە سىيعا تارتتىم, – دەيدى تانىمال سۋرەتشى, مادەنيەت قايراتكەرى تىلەۋجان باتانوۆ.
ۇلتتىق سۋرەت گالەرەياسىندا ءوتكەن سالتاناتتى شاراعا شەتەل مەملەكەتتەرىنىڭ قازاقستانداعى ەلشىلىكتەرى قىزمەتكەرلەرى, پارلامەنت دەپۋتاتتارى, قوعامدىق ۇيىم وكىلدەرى قاتىستى.
گۇلميرا ايماعانبەت
