ەلىمىز تاۋەلسىزدىگىن العان جىلى دۇنيەگە كەلىپ, سودان بەرى تالاي دارىندى ءانشىنىڭ جولىن اشقان «جاس قانات» رەسپۋبليكالىق بايقاۋى ەلوردادا كەزەكتى مارتە دۇركىرەپ ءوتتى. بيىلعى بايقاۋدىڭ باس جۇلدەسىنەن ۇمىتكەرلەر بەيبىتشىلىك جانە كەلىسىم سارايىندا ءۇش كۇن بويى ونەر جارىستىردى.
كونكۋرستىڭ ءبىرىنشى كۇنى ەلىمىزدىڭ 10 قالاسىنان 15 تالاپكەر ءانشى ساحناعا شىقتى. ولاردىڭ ونەرىنە بەلگىلى مۋزىكاتانۋشى يۋري اراۆين, قازاقستاننىڭ حالىق ءارتىسى نۇرجامال ۇسەنباەۆا, قر ەڭبەك سىڭىرگەن قايراتكەرلەرى ابزال مۇحيتدينوۆ, سەرىك ەركىنبەكوۆ, رايسا مۇساقوجاەۆا, ەرجان ءداۋىتوۆ, «جاس قانات» جانە «ازيا» داۋىسى بايقاۋلارىنىڭ نەگىزىن قالاۋشى مۇرات ەرعاليەۆ, اتالمىش بايقاۋدىڭ تۇڭعىش لاۋرەاتتارى ەرلان كوكەەۆ پەن مارجان اراپباەۆا, «حابار» ارناسىنىڭ پروديۋسەرى يراك ەلەكەەۆ باعا بەردى. سونىڭ قورىتىندىسىندا قاتىسۋشىلار سانى ازايىپ, 11 ءانشى عانا كەلەسى كەزەڭگە جولداما الدى.
ەكىنشى كۇنى كونكۋرسانتتاردىڭ قاتارى تىپتەن سەلدىرەپ قالدى. ولاردىڭ اراسىندا بولعان ەلوردالىق بەس ءانشىنىڭ ۇشەۋى – سۇلەيمەن ولجاس, نۇربول سىدىقوۆ جانە نۇرلان تۇكەنوۆ, وكىنىشكە قاراي, جارىستان شىعىپ قالسا, سۇلتان احمەت پەن ەركەبۇلان تۇرماحامبەتوۆ فينالعا دەيىن جەتتى.
سونىمەن, فينالدا اقتىق مارەگە دەيىن جەتكەن 6 ونەرپاز ءوز قابىلەتتەرىن قازىلار القاسىنىڭ تالقىسىنا سالدى. قازىلاردىڭ ۇيعارىمىمەن اقان سەرى, ءبىرجان سال, ۇكىلى ىبىراي سەكىلدى ارقا انشىلىك ونەرى مايتالماندارىنىڭ سارقىتى, كوكشەتاۋلىق رينات تەمىرجان جەڭىمپاز اتاندى. باس جۇلدەگە تىگىلەتىن «التىن قانات» پەن استانا اكىمىنىڭ اقشالاي سىيلىعىن وعان قالا اكىمىنىڭ ورىنباسارى ەرمەك امانشاەۆ تابىستادى. ءبىر اتاپ وتەر جايت, جەرەبى تارتۋ ءراسىمى كەزىندە ريناتقا ۇلتىمىز قاسيەتتى سانايتىن «7» سانى بۇيىرعان ەدى. اقىرى جەڭىسكە جەتتى. وسىدان كەيىن ىرىمعا سەنبەي كور…
وسى جولعى «جاس قانات-2015» بايقاۋىنا ءۇش قىز عانا قاتىسقان ەدى. نازىك جاندى تالاپكەر انشىلەردىڭ قاتارىنداعى ءبىرىنشى كۇنگى جارىستا شەتەلدىك تانىمال ءانشى بەيونستىڭ «Listen» – قازاقشالاعاندا «تىڭداشى» ءانىن ورىنداپ, جوعارى 145 ۇپاي جيناعان قاراعاندىلىق لاۋرا ايتباەۆا عانا فينالدا ونەر كورسەتتى. تاتتىمبەت اتىنداعى ونەر كوللەدجىن بيىل بىتىرەتىن ارۋ بايقاۋ باستالماس بۇرىن «مەن ءۇشىن جەڭىس ەمەس, وسى بايقاۋعا قاتىسۋدىڭ ءوزى قۋانىش» دەگەن بولاتىن. «ارىق ايتىپ, سەمىز شىق» دەمەكشى, لاۋرا ەكىنشى ورىننان كورىنىپ, «كۇمىس قاناتقا» قول جەتكىزدى.
استانا دا جۇلدەسىز قالعان جوق. ءۇشىنشى ورىن العان سۇلتان احمەت «قولا قانات» يەگەرى اتاندى. جۇلدەگەرلەردىڭ شىققان جەرىنە قاراپ وتىرساق, «ارقاعا كەلسەڭ, ءانشىمىن دەمە» دەگەن ءسوزدىڭ اقيقاتتىعىنا تاعى كوز جەتكىزەمىز. ۇلكەن انشىلىك مەكتەبى قالىپتاسقان ءوڭىر ورەندەرى بۇدان بيىك بايقاۋلاردا دا توپ جاراتىنىنا سەنىمدىمىز.
سونىمەن, ۇيىمداستىرۋشىلارى – استانا قالاسىنىڭ اكىمدىگى, «حابار» اگەنتتىگى جانە «ازيا داۋىسى» بايقاۋىنىڭ ديرەكتسياسى بولعان «جاس قانات-2015» بايقاۋى تاريح قويناۋىنا ءسىڭىپ بارادى. كەلەسى جىلى بايقاۋعا 25 جىل تولادى. سول كەزدە ول ءوزىمىزدىڭ پايىمداۋىمىزشا, بۇدان دا زور دەڭگەيدە ۇيىمداستىرىلۋى ءتيىس.
