«… ول اينالاسىنا ۇنەمى جىلۋ سىيلاپ جۇرەتىن جان. مامان رەتىندە كوپتەگەن ايەل زاتىنىڭ انا باقىتىن سەزىنۋىنە ىقپال ەتتى. مەنىڭشە, وسىنداي جانداردىڭ ارقاسىندا ءومىر جاقسارا تۇسپەك. ەلىمىز ولار جايلى ءبىلىپ قانا قويماي, ولاردان ۇلگى الۋ كەرەك دەپ ويلايمىن…».
«استانا تاڭداۋى – 2012» بايقاۋىنىڭ العاشقى كۇنى اكىمدىكتىڭ ارنايى سايتىنا اۆتورى بەلگىسىز وسى حات كەلىپ ءتۇستى.
حاتتىڭ كەيىپكەرى – استانا قالاسى پەريناتالدىق ورتالىعىنىڭ اكۋشەر-گينەكولوگ دارىگەرى ۆلاديمير كالاشنيكوۆ ەدى.
ۇزدىكتەر قاتارىنان ۇمىتكەر بۇل كەيىپكەر بايقاۋ شارتى بويىنشا بەرىلگەن حالىق داۋىسى بويىنشا سول كۇنى-اق وزگەلەردەن وق بويى وزىپ شىقتى.
ءبىر قىزىعى, اتالعان بايقاۋعا ۇسىنىلعانىن, 4926 داۋىسپەن ارىپتەستەرىنىڭ اراسىنان جەڭىمپاز دەپ تانىلعانىن ءۆلاديميردىڭ ءوزى داۋىس بەرۋ اياقتالعان سوڭ ءبىر-اق ءبىلدى.
ازاماتتى ارداقتايتىن ەلى بولسا, ەڭبەگىنىڭ جانعانى.
مەڭگەرگەنى دەنساۋلىق كۇزەتىنىڭ العى شەبىندە جۇرەتىن ماماندىق بولسا دا, ءبىر كەزدەرى «ەر ادامعا قول ەمەس» دەگەن پىكىرلەردى ەستىگەنى دە جاسىرىن ەمەس.
الايدا, ول ءوزىنىڭ ەڭبەك تاجىريبەسىندە بۇل سالاعا اداسىپ كەلمەگەنىن دالەلدەدى.
مىڭداعان, بالكىم ودان دا كوپ ايەلدىڭ انا اتانۋىنا سەبەپكەر بولدى. سونشاما ءسابيدىڭ كىندىگىن ءوز قولىمەن كەستى.
ءوزى كىندىگىن كەسكەن سابيلەردىڭ اتا-اناسىنىڭ ىقىلاس-نيەتىنەن اسقان ەشتەڭە جوق ەكەنىن بۇعان دەيىن دە ءجيى ايتىپ جۇرەتىن. «العىستان ارتىق ەشتەڭە جوق ەكەنىنە تاعى دا كوزىم جەتتى», – دەيدى.
سەبەبى, بايقاۋدا وزىنە قولداۋ تانىتقان 4 مىڭنان استام داۋىستى ۆلاديمير حالىقتىڭ وزىنە بەرگەن باعاسى, ايتقان العىسى دەپ قابىلدادى.
بايقاۋعا بەس سالا بويىنشا 62 ۇمىتكەر قاتىستىرىلعان بولاتىن. ولارعا ونلاين رەجيمدە 95 مىڭنان استام استانالىق داۋىس بەردى. اراسىنان بەس ۇمىتكەر جۇزدەن جۇيرىك شىعىپ, جەڭىمپاز اتاندى.
تاياۋدا عانا جاريالانعان ەلباسى نۇرسۇلتان نازارباەۆتىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» باعدارلامالىق ماقالاسىندا ەڭبەك قوعامىن قۇرۋ ءۇشىن الدىمەن ەڭبەكشىگە دەگەن قۇرمەت بولۋى قاجەتتىگى ايتىلعان ەدى.
«وسى ورايدا, بايقاۋ ءوز جەڭىمپازدارىنىڭ جۇمىسقا دەگەن جاۋاپكەرشىلىگىن ارتتىردى, ىنتاسىن وياتا ءتۇستى دەپ ويلايمىن», – دەيدى ۆلاديمير.
جالپى, ءوزى دە «ارقاشان ىسكە دايىن بول!» دەگەن ۇستانىممەن ءومىر سۇرەتىن جان. ويتكەنى, ماماندىعى قاشاندا ءتاستۇيىن دايىندىقتى, سەزىمتالدىقتى تالاپ ەتەدى.
وعان قوسا, ەلدىڭ باس قالاسىندا قىزمەت ەتۋدىڭ ۇلكەن جاۋاپكەرشىلىگى تاعى بار.
«بۇگىنگى كۇنى استانالىق قىز-كەلىنشەكتەردىڭ دەنساۋلىعى جاقسارىپ كەلەدى. بالا تۋ كورسەتكىشى دە ءبىرشاما ارتتى. ال, وسى جاعىمدى جاڭالىقتاردىڭ مەنىڭ ماماندىعىممەن تىكەلەي بايلانىستى بولۋى كوڭىلىمە قۋانىش ۇيالتادى», – دەيدى ۇزدىك دارىگەر.
استانا قالاسى حالقىنىڭ سانى 2012 جىلعى 1 ماۋسىمداعى ەسەپ بويىنشا 758007 ادامعا جەتتى. 2011 جىلدىڭ ءدال وسى كەزەڭىمەن سالىستىرعاندا ەلوردا حالقىنىڭ جالپى سانى 15089 ادامعا ءوسىپتى.
استانادا كۇن سايىن كەمىندە 40 ءسابي دۇنيەگە كەلەدى. ولاردىڭ امان-ەسەن جارىق دۇنيە ەسىگىن اشۋىنا ۆلاديمير كالاشنيكوۆ قىزمەت ەتەتىن پەريناتالدىق ورتالىق ۇجىمى دا ۇلكەن ۇلەس قوسۋدا.
ىرگەتاسى 1978 جىلى قالانعان پەرزەنتحانا العاشىندا 100 ورىنعا لايىقتالسا, بۇگىندە پەرزەنتحانانىڭ ءبىر اۋىسىمدا 250 ادامدى قابىلدايتىن ايەلدەر كەڭەسى, 150 ورىندىق ستاتسيونارى بار.
ورتالىق دارىگەرلەرى انا مەن بالا ءولىمى كورسەتكىشىن تومەندەتۋ, گينەكولوگيالىق سىرقاتتاردى ازايتۋ ماقساتىندا اۋقىمدى شارۋالار اتقارىپ ءجۇر. حالىق قالاۋلىسىنا اينالعان ۆلاديميردەي «التىن قول» دارىگەرلەرى بار كەزدە بۇل ۇجىم ءالى دە تالاي جاننىڭ ساۋابىن الارى انىق.
ايتپاقشى, ءۆلاديميردىڭ كەلىنشەگى ولگا دا اكۋشەر-گينەكولوگ دارىگەر. ومىردە دە, ەڭبەكتە دە قاتار جۇرگەن قوس مامان الداعى ۋاقىتتا دا ەلوردانىڭ دەنساۋلىق ساقتاۋ سالاسىن جاقسارتۋ جولىندا قىزمەت ەتىپ, حالىق يگىلىگى ءۇشىن ايانباي تەر توگەتىنى انىق.
شىنار دوسان
