ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترى تىڭ جانردا پرەمەرا ۇسىندى. استانا تۋرالى, باس قالاداعى ادامداردىڭ ءومىرى جايىندا بوياماسىز شىندىقتى كورسەتەتىن «01» سپەكتاكلى درامەديا جانرىندا ساحنالاندى. بۇل قاراپايىم تىلمەن ايتقاندا كومەديالىق دراما اۆتورى ءارى قويۋشى رەجيسسەرى – گالينا پيانوۆا, قوسالقى اۆتورى – قىمبات ەلۋباەۆا.
قويىلىمنىڭ ءبىر ەرەكشەلىگى, ونداعى وقيعالار ناقتى ومىردەن الىنعان. سپەكتاكل پروتوتيپتەرى – استانا قالاسىنىڭ تۇرعىندارى. اۆتورلار رىستى احمەتوۆا, قونىس ءالىمجانوۆ, مارات بورباسوۆ, ءلاززات قىستىقباەۆا, ديانا ەربۋسانوۆا, گۇلدانا نابيەۆا سىندى استانالىقتارمەن سويلەسىپ, ولاردىڭ باستان كەشكەنىن ساحنالىق قويىلىمعا اينالدىرعان.
سپەكتاكلدە اقمولا بەكىنىسىنىڭ سالىنۋى, تىڭ يگەرۋ, استانانىڭ حالىقارالىق تۇساۋكەسەرى, «ەكسپو-2017» كورمەسى, ت. ب. باس قالانىڭ كەشەگى جانە بۇگىنگى تاريحىنداعى ەلەۋلى وقيعالار قامتىلعان.
ءبىر ايتا كەتەرلىگى, پرەمەرا تەاتردىڭ ەكسپەريمەنتالدى الاڭىندا ءوتتى. سپەكتاكل اكتەرلەر مەن كورەرمەندەرگە ۇيرەنشىكتى ساحنادا ەمەس, پاركينگتە وينالدى. قويىلىم رەجيسسەرى گالينا پيانوۆانىڭ ايتۋىنشا, كورەرمەندەر ارتىستەردى وتە جاقىن قاشىقتىقتا كورۋ, ءتىپتى قويىلىم اراسىندا جۇرگەندەي سەزىمدە بولۋ ءۇشىن سونداي شەشىم شىققان.
– ەكسپەريمەنتالدى الاڭنىڭ تاعى ءبىر ارتىقشىلىعىنىڭ ءبىرى مۇندا ەشقانداي شەكتەۋ جوق. ارتىستەر ءبىر جەردەن ەكىنشى جەرگە ەركىن وتەدى, – دەيدى رەجيسسەر.
اقمولا ەلوردا اتانىپ, استانا اتاۋىن يەلەنگەلى بەرى باس قالاعا جان-جاقتان ادامدار اعىلدى. حالىق ءنوپىرى ءالى دە تولاستار ەمەس. اركىم ءارتۇرلى ماقساتپەن كەلدى. اراسىندا ارمان قۋىپ كەلگەندەر دە از ەمەس. قويىلىمنىڭ باس كەيىپكەرى ءاليحان دا ءارتىس بولامىن دەگەن ارمانىن ارقالاپ كەلگەن ەدى. اۋىلدا وسكەن وعان قالا ادامدارىنىڭ تىنىس-تىرشىلىگى, قاربالاس ءومىر تاڭسىق كورىندى. اكتەر داستان ءالىموۆ سومداعان بۇل كەيىپكەر – اۋىل تۇرعىندارى سياقتى اڭعال, جانى تازا ازامات. وسىندا ول قاتىگەزدىكپەن, مەيىرىمسىزدىكپەن, توعىشارلىقپەن بەتپە-بەت كەلىپ, ابدىراپ قالادى. «مىنا دۇنيە قايدا كەتىپ بارا جاتىر؟» دەپ ويلانىپ, ونى جاقسى جاعىنا وزگەرتۋگە تىرىسادى.
بۇرىننان تىلىمىزدە قالىپتاسقان «اتىڭ شىقپاسا, جەر ورتە» دەگەندى بۇگىنگى زاماندا «اتىڭ شىقپاسا, الەۋمەتتىك جەلىگە شىق» دەپ وزگەرتىپ ايتۋعا بولادى. شىنىمەن, قازىر تانىمال بولۋ ءۇشىن الەۋمەتتىك جەلىگە شىعىپ, جۇرتتى ەلەڭ ەتكىزگەن جەتكىلىكتى. كەشەگى سەكسەنىنشى جىلدارى تانىلعان «Modern Talking» توبىنىڭ «You’re My Heart, You’re My Soul» انىنە اۋىلىندا بيلەپ, الەۋمەتتىك جەلىگە سالىپ جىبەرگەن ءاليحاننىڭ بەينەجازباسى ميلليونداعان قارالىم جينايدى. ءبىر تەلەارنا توك-شوۋىنا ونى قوناق قىلىپ شاقىرادى. سودان استاناعا كەلگەن ءاليحان ءتۇرلى وقيعاعا تاپ بولادى.
قويىلىمدا ءومىردىڭ كۇنگەيى مەن كولەڭكەسى الماسىپ وتىرادى. كەيىپكەرلەرگە كەلسەك, قىزىلدى-جاسىلدى ءومىردى كورسەتۋگە قۇمار تەلەارنا جۇرگىزۋشىلەرى, ءتىلى مەن جاعىنا سۇيەنگەن اسابالار, بالالارىن اسىراۋ ءۇشىن بىرنەشە جەردە جۇمىس ىستەۋگە ءماجبۇر انا, ساتسىزدىككە ۇشىراعان ينجەنەر, «ەكسپو» كورمەسىندەگى قاراۋىل بولىپ كەتە بەرەدى. اراسىندا شىڭعىس حان مەن «اقمولا قازاقتىڭ استاناسى بولسا» دەگەن ۇلت كوسەمى ءاليحان بوكەيحان بەينەلەرى دە جىلت ەتەدى. وسىلاردى قازاقستاننىڭ ەڭبەك سىڭىرگەن قايراتكەرلەرى اقىش ومار, كۇليا قوجاحمەتوۆا, كەڭەس نۇرلانوۆ, قۋاندىق قىستىقباي, ەرلان مالاەۆ, اينۇر بەرمۇحامبەتوۆا سومدايدى. سپەكتاكلگە قاسىمحان بۇعىباي, گاۋھار ءجۇسىپوۆا, جانات وسپانوۆ, زاڭعار ابەنوۆ, ينابات ابەنوۆا, ديانا جولدىبەك, ءبازىل سۇلتانعازى سىندى اكتەرلەر دە تارتىلعان. ال قويىلىم نۇكتەسىن قاللەكي تەاترىنىڭ سيمفونيالىق وركەسترى قويادى.
