Кеше «Rаdisson» қонақ үйінде Елбасының «Қазақстан – 2050: «Бір мақсат, бір мүдде, бір болашақ» Жолдауында көрсетілген міндеттерді жүзеге асыру мақсатында Астана қаласы Білім басқармасының ұйымдастыруымен «Кәсіптік білім және бизнес: әріптестер сұхбаты» атты V қалалық форум өтті.
«Елордалық колледждерде дуальды жүйе белсенді енгізіліп жатыр, онда оқу уақытының 65%-ын оқушылардың тәжірибелік дағдыларын дамытуға жұмсау көзделген. Мүдделі жұмыс берушілер студенттерге жұмыс үдерісімен танысу үшін өздерінің базаларын ұсынады. Өткен оқу жылында кәсіби дағдыларды жетілдіру аясында 10500 студент кәсіпорындарда өндірістік тәжірибеден өтті. Биылғы оқу жылында 11 мың студент осындай мүмкіндікке ие болмақ» деді форумда Астана қаласы білім басқармасының басшысы Эльмира Суханбердиева.
Қазіргі кезде Астана қаласының 34 колледжінде 28 мыңнан аса болашақ маман білім алуда. Техникалық және кәсіптік білім беру жүйесі 66 түрлі мамандық пен 113 квалификацияны қамтиды. Астана қаласы әкімдігінің қолдауымен соңғы үш жылда жергілікті бюджеттен бөлінетін мемлекеттік білім беру тапсырысын ұлғайтудың есебінен техникалық мамандықтар бойынша студенттер контингенті 30%-ға артқан. 2013 жылы колледждердің материалдық-техникалық базасын дамытуға 204 млн теңге, соның ішінде 70 миллионы жергілікті бюджеттен бөлінді. Биыл 185 млн теңге бөлінді.
Негізі, әріптестік меморандумдар мен жаңа келісімдерге қол қоюды, оқу орындары мен өндірістік кәсіпорындар арасындағы байланысты тереңдетуді, кәсіптік және техникалық білім беру ұйымдарын дамытуды, орта буын мамандарының мәртебесі мен имиджін көтеруді мақсат тұтқан бас қосуға Астана қаласының әкімдігі, Білім және ғылым министрлігінің өкілдері, жұмыс берушілер, мәслихат депутаттары, қоғам қайраткерлері, ардагерлер, техникалық және кәсіптік білім ұйымдарының қызметкерлері қатысты.
Форум соңында техникалық және кәсіби білім беру жүйесін дамытуға қосқан үлесі үшін әлеуметтік серіктестер, білікті мамандар даярлайтын өндірістік оқытудың шеберлері Астана қаласы әкімдігінің алғыс хаттарымен, мадақтамаларымен марапатталды.
Жұма ҒАЗИЕВ
