Астанада жаппай улану оқиғасы тiркелдi. «Қазақстан» спорт кешенiндегi «Олимп» мейрамханасынан тамақтанған 36 адам қалалық жұқпалы аурулар ауруханасына «iшек инфекциясын жұқтырды» деген диагнозбен жеткiзiлдi.
Сархат БЕЙСЕНОВА,
Астана қаласы Мемлекеттiк санитарлық-эпидемиологиялық қадағалау департаментiнiң директоры:
Бiз қалалық жұқпалы аурулар ауруханасына түскен 36 науқастың ауруына себеп болған жәйттi анықтадық.
Ауруханаға түсердiң алдында олардың бәрi «Қазақстан» спорт кешенiндегi «Олимп» мейрамханасынан тамақтанған. Арасында Өскеменнен келген балалар хоккей командасының мүшелерi де бар болып шықты. СЭС мамандары жедел түрде осы нысанға тексеру жұмыстарын жүргiздi.
Нәтижесiнде, мейрамханадағы қуырылған котлет пен АҚШ-тан әкелiнген тауық еттерiнен сальмонелла бактериясы, пiсiрiлген сәбiзден iшек инфекциясы және «Комо» iрiмшiгiнен стафилококк сапрофитикус деп аталатын бактерия түрлерi анықталды. Арнайы зертханалық тексерулер қорытындысы науқастардың осы микроорганизмдерден ұшынғанын анықтады.
Мейрамхана санитарлық талаптарға сай жұмыс жасамаған.
Осыған сәйкес бiз анықталған кемшiлiктер жойылғанға дейiн мейрамхана жұмысын уақытша тоқтату үшiн Астана қаласының ауданаралық мамандандырылған экономикалық сотына құжаттарды тапсырдық.
Қаланың қоймалары мен сауда орындарына түсетiн ет және құс өнiмдерiн бақылау үшiн жоспардан тыс тексеру жүргiзу жөнiнде бұйрық шығардым.
Ал, «Қазақстан» спорт кешенiнiң директоры әкiмшiлiк жазаға тартылып, 30 айлық көрсеткiш есебi мөлшерiнде айыппұл төлейдi.
Жаңабай ЖҰМАҒАЗИН,
Астана қалалық жұқпалы аурулар ауруханасының бас дәрiгерi:
Төрт күн қатарынан ауруханаға жалпы саны 36 адам асқынған iшек инфекциясын жұқтырды деген диагнозбен келiп түстi. Ауру жеңiл және орташа дәрежеде өттi.
Жалпы, көктем жаз мезгiлдерiнде гигиеналық талаптар сақталмаса, астан келер аурудың түрi көп.
Әсiресе, ет өнiмдерiнен дайындалған тағамдарда, сүтте кездесетiн «сальмонелла» деп аталатын зиянды микроорганизм өте қауiптi болып саналады. Тiптi, бұл бактерия құстың жұмыртқасына да ене алады. Тез көбейедi. Сальмонеллалар тамақтың түсiн, дәмiн өзгертпейдi, бiрақ күшейе келе өзiнен улы токсиндер бөледi.
Бiздiң ауруханамызға күнiне осы диагнозбен кем дегенде 4-5 адамға дейiн түседi.
Сальмонеллез адамның жалпы жағдайына байланысты жеңiл өтуi де, өмiрге қауiп тудырардай аса ауыр тиюi де мүмкiн. Созылмалы сипат алып, айларға, тiптi жылдарға дейiн созылуы да ықтимал. Бәрi де уақытылы, жүйелi емдеуге байланысты.
Бiзге келiп түскен 36 науқас құлан-таза айығып, 11 сәуiр күнi ауруханадан шығарылды. Алдағы уақытта бәрi де тұрғылықты жерi бойынша тексерiлiп тұратын болады.
Шынар ДОСАН
