ЕЛОРДАЛЫҚ ПОЛИЦЕЙЛЕР ТӘЖІРИБЕ АЛМАСТЫ
Қытайдың Пекин қаласында Шанхай ынтымақтастық ұйымы мемлекеттерінің құқық қорғау басқармалары бас қосты. Қазақстандық делегацияны Астана қаласы Ішкі істер департаментінің басшысы полиция генерал-майоры Амантай Әубәкіров бастап барды.
Аталмыш конференцияның мақсаты айқын. Елдер арасындағы ынтымақтастықты нығайту, қауіпсіздік пен тұрақтылықты қорғау, достық қарым-қатынасты жақсартуды көздейді. Ашылу салтанатында сөз сөйлеген Қытайдың Мемлекеттік кеңес мүшесі және Қоғамдық қауіпсіздік министрі Го Шэнкунь астаналық полицейлерді терроризммен, киберқылмыстармен, есірткі және трансұлттық ұйымдасқан қылмыстармен бірлесе күресуге шақырды. Өз кезегінде департамент басшысы Амантай Әубәкіров Шанхай ұйымы мемлекеттерінің
полициясымен ашық және елордалық тәжірибемен бөлісуге дайын екендігін атап өтті.
Одан кейін конференцияға қатысушылар Пекиннің Жедел басқару орталығына барып, арнайы бөлім қызметкерлерінің дене дайындықтарын бақылады. Бейжіңдік полицейлер қоян-қолтық күресінің элементтерін көрсетіп, тұтқынға түскендерді түрлі жағдайлардан босатып алу: ғимараттан, автокөліктен, қылмыскерлерді құрықтау, түрлі қарулардан жасалатын снайперлік дағдылар, жаппай тәртіпсіздік кезіндегі іс-әрекеттер алгоритмін көрсетті. Полицейлерге арнайы техниканың көрсетілімі де ұсынылды.
Айта кеткен жөн, өткен қазан айында ресми сапар аясында Қытайдың Нинся-Хуэйлік автономды ауданы мен Шанси провинциясының Қоғамдық қауіпсіздік департаменті қызметкерлері Астана қаласы Ішкі істер департаментінде болып, өзара тәжірибе алмасқан еді. Жедел-іздестіру шараларын жүргізу мақсатында Астана қаласына Ресейден, Қырғызтан және Өзбекстан елінен де әріптестер бірнеше мәрте келіп кетті.
– Келер жылы Астанада
«ЭКСПО-2017» халықаралық көрмесі өткізіледі. Соған орай кең ауқымды халықаралық іс-шараларды өткізу кезінде қоғамдық қауіпсіздік пен тәртіпті қорғауды қамтамасыз ету бойынша мұндай тәжірибе алмасу өзекті, – дейді А.Әубәкіров.
Гүлмира АЙМАҒАНБЕТ