Су бетіне мұз қата салысымен бірінші болып коньки мен шана тебуге асыққан балалар мен жасөспірімдер өзенге жүгіреді. Жұқа мұздың үстімен жүрудің аса қауіпті екендігін құтқарушылар жақсы біледі. Қайғылы оқиғалардың алдын алу үшін елордалық ТЖ қызметі тәулік бойғы режимде жұмыс істейді. Мұнарадан бақылау жүргізіліп, жағалау сызығы шолынады, қаладағы су тоғандарындағы мұз қабатына мониторинг жүргізіледі. Қазір арнайы жасаққа 76 құтқарушы тартылған, үйретілген иттер де көмекке келуге дайын.
«Соңғы үш жылда мұз қатуға қатысты қайғылы оқиғалар тіркелген жоқ. Біз ауқымды үгіт-насихат жұмыстарын жүргізіп отырамыз. Ұйымдар мен кәсіпорындарға, оқу мекемелеріне үш мыңға жуық материал тараттық. Күн сайын бірнеше адамға – балықшыларға, балаларға ескертеміз. Коньки теуіп жүрген ұлдарды көруге болады. Олар бізді көре сала қашып кетеді де, кейін өзенге қайтып келеді. Биыл өзенге мұз қату мектеп демалысымен сәйкес келді, сол себепті ата-аналардан балаларына қарайлап, оларды өзенге жібермеуді сұраймыз», – деп мәлім етті Астана қ. Орталық өңірлік аэроұтқыр жедел-құтқару жасағы басшысының орынбасары Бейсенбай Жексенов.
Сондай-ақ, ол мұз астына құлаған кезде ереже сақтаудың маңыздылығын атап көрсетті. Оның айтуынша, ең бастысы үрейленбей, көмекке шақыру керек. Жүкті, жолдорбаны бір иыққа асу керек, ал ең жақсысы оны мұздың үстіне салып, сүйрету. Шұғыл қимылдамаған дұрыс. Мұз үстіне екі қолдың арасын кең ашып, құлаған жаққа қарай шығу керек.
Синоптиктердің болжамына сәйкес, жылы ауа райы қарашаның үшінші онкүндігіне дейін сақталады. Содан кейін ауа температурасы төмендеуі мүмкін.
astana.gov.kz
