FIDIC САПА СТАНДАРТЫ ЕНГІЗІЛДІ
Жақында өткен Үкіметтің кеңейтілген отырысында Елбасы Нұрсұлтан Назарбаев еліміздегі автомобиль жолдарының сапасын сынға алып, бұл бағытта жаңа технологиялардың жұмыс істемейтінін атап өткен болатын. Кеше ҚР Президенті жанындағы Орталық коммуникациялар қызметінің брифингіне қатысқан Көлік және коммуникация министрі Асқар Жұмағалиев автокөлік жолдарынының даму перспективасы жайлы баяндап берді.
– Қазіргі кезде жол саласында бірнеше проблемалар бар. Еліміздегі жолдардың 33 пайызының сапасы сын көтермейді. Жөндеу жұмыстарының сапасын жақсарту керек. Осы мәселелерді шешу мақсатында біз келесідей жұмысты қолға алдық: биыл біз 5898 шақырым жолға жөндеу жұмыстарын жүргіздік. Сондай-ақ, Батыс Еуропа – Батыс Қытай мега жобасында қазіргі кезде қарқынды жұмыс атқарып жатырмыз. Биыл жоспар бойынша 806 шақырымын салуымыз керек болса, бүгінгі күні оның 710 шақырымын салдық. Қалғанын осы жылдың аяғына дейін бітіреміз деген үмітіміз бар, – деді министр.
Президент берген тапсырмаға сәйкес Астана – Павлодар, Астана – Теміртау, Алматы – Қапшағай жол учаскелерінде құрылыс жұмыстары басталыпты. Жаңа технологияларға арналған 40 экспериментальді учаске бар. Мемлекет басшысы айтқан монолитті темір бетон технологиясын қазір сынақтан өткізіліп жатыр. Пилоттық жоба қазіргі кезде жақсы нәтиже көрсетуде. Сынақтан өткеннен соң, ол қолданысқа енгізілмек.
– Сыбайлас жемқорлықты болдырмау, бағалауды күшейту мақсатында басқару құрылымын өзгерттік. FIDIC халықаралық сапа стандартын енгіздік. Енді жол сапасын осы стандартқа сәйкес бақылауда ұстап отырмыз», – деп министр Асқар Жұмағалиев тағы бір соны жаңалықпен бөлісті. Сондай-ақ, автомобиль жолдарын басқарудың автоматтандырылған жүйесі әзірленіп жатқанын, ол дайын болғаннан кейін жүргізушілер жолдың сапасын көре алатынын және бағытты жоспарлай алатынын жеткізді. Сыбайлас жемқорлықты жою мақсатында стационарлық бекеттерде автоматтандырылған аркалар орнатылатынын, биыл осындай 13 арка қойылатынын, келесі жылы 31 арка орнату жоспарланғанын, 2015 жылға қарай олардың саны 80-ге дейін жететінін айтты. Сонымен бірге Елбасының тапсырмасымен Көлік инфрақұрылымын дамыту бағдарламасы дайындалып жатқанын 2020 жылға қарай қолданыстағы жолдардың 29 мың шақырымын жөндеуден өткізуді жоспарлап отырғанын хабарлады.