Биыл Өзбек елінің Қазақстан Республикасындағы жылы болып жарияланды. Жыл аясында біршама шаралар өтіп жатыр. Олардың ортасында өзіміз де жүрміз. Мен – қазақтың өзбегімін. Оны мақтан тұтамын. Ата дәстүрімізді жалғастырып, өз дінімнен, ділімнен ажырамағаныма қуанамын. Түп қазығымның нық болуына өзім жасап жатқан қазақ елінің кеңдігі, ұлттар саясатының салтанаты дер едім.
Осы орайда, Қазақстан халқы бірлігі күнінің қарсаңында өткен кезекті алқалы жиынға тоқталмай өте алмаймын. Ол – жыл сайын алдағы жылдың бағытын анықтап беретін, Қазақстан халқы Ассамблеясының Сессиясы. Кезекті ХХVІ сессия «Бес әлеуметтік бастама – қоғамның әлеуметтік бірлігінің тұғыры» тақырыбында өтті.
Менің өзім, еліміздегі мызғымас бірліктің ұйытқысы әрі татулық пен бірліктің кепіліндей болған Қазақстан халқы Ассамблеясының бір мүшесі ретінде осы жиынды асыға күттім. Ондағы айтылатын сессия төрағасы Нұрсұлтан Әбішұлының тұжырымдары күнделікті істеп жүрген шаруама да басқа көзбен қарап, оның терең мағынасына бойлауға жетелейді. Біздерді игілікті жұмыстарға жұмылдырып, өмірдің мәнін табуға итермелейді. Еліміздің түкпір-түкпірінен келіп, жиналыс мінберіне жарыса шығып, Елбасыға арнап айтылған әріптестерімнің лебіздері де көңілден шығып жатты. Соның ішінде Астана қаласының өзбек этно-мәдени орталығының төрағасы Шерзод Пулатовтың Президентке жолдаған құрметке толы алғыс сөзіне толықтай қосыламын. Ел үшін, Отан үшін жан аямай жұмыс жасаған Елбасыға дән ризашылығымыз жүрегіміздің түкпірінен шығады. Бұл Елбасымыздың бағдарламасы бойынша алға қойған негізгі міндеттерін орындауға құлшына кірісуге бастайды.
Міне, мен 20 жыл бойы нан пісіру кәсібімен айналысып келемін. Астананың наубайымын десе де болады. Жұмысым өзіме қатты ұнайды. Иісі бұрқыраған ыстық нан әрбір жанұяның дастарханында болса екен деп тілеймін. Нан болса, ән де болады. Мен бастаған жұмыс кәсібімнің еңбек өтілі Астана қаласының мерейлі жасымен тең екен. Құрдас десем де болады. Кәсібім мен Бас қалам көз алдымда өсіп, өркен жайды. Содан да елорданың дамуына мүдделі болып, табысымның бір бөлігін қайырымдылық қорына бөлемін. Егде тартқан қарттарға, Ұлы Отан соғысының ардагерлеріне, Қарттар үйіне, көп балалы отбасыларына қолымның ұшын беріп, көмегімді аямауға тырысудамын. Өзімнің жұмысым арқылы қаламыздың көркеюіне, достығымыздың нығая түсуіне, халқымыздың тыныштығын қорғауға осылайша атсалысудамын.
Қазақстан Республикасындағы өзбек «Достық» этно-мәдени орталығының төрағасының орынбасары ретінде республикамызда өзбек мәдениетін насихаттауға да араласудамын. Әрбір мерекеге жайылған дастарханды өзбектің ұлттық тағамы палау және пәтір нанымен толтырып, ырысын арттыру – мен үшін ардақты іс. Өз басым осындай кештер арқылы екі туысқан ел татулығы нығая түседі деп ойлаймын.
Одан басқа ұлт өкілдері мен қалалық этномәдени орталықтарының төрағаларымен осындай мол дастарқан басында да кездесіп жатамыз. Осындай отырыста Астана қаласының 20 жылдық тойы және Өзбек елінің Қазақстан Республикасындағы жылына қатысты не айтарымыз бар, нені насихаттап, бұқараға нені жеткізуіміз керек дегендей ішкі мәселелерді бірлесе шешеміз. Мұндай сәттерде ойымыз бір жерден шығып, бір-бірімізді түсініп, тілі мен діліне, ұлты мен ұлысына қарамастан бірге туған бауырдай сезінеміз. Оның құпиясы – дүниедегі бар берекенің бастауы, жақсы күніміздің белгісі қасиетті нанның арқасында дер едім.
Дара жолды жазбай танып, бар ықыласымызды бейбітшілік пен келісім жолына аударып, дұрыс таңдау жасауға серпін берген халқымыздың басшысы, Елбасыға алғысымызды білдіремін.
Осындай мамырдың мерекелі сәттерінде Қазақстан Республикасының байрағы желбірей берсін дегім келеді.
