Dästürlı «Qazaqstan barysy» turnirınıŋ kezektı mausymy da kelıp jettı. Elımızdıŋ tükpır-tükpırınen jinalǧan kıl myqtylar 29-mausym künı Astanadaǧy «Saryarqa» velotregınde boz kılemge şyǧady. Är öŋırden qos-qosymen jetken qazaq küresımen ainalysuşy paluandar biylǧy bas jüldenı özara sarapqa salatyn bolady.
Ūlt Köşbasşysy, QR Prezidentı N.Ä.Nazarbaevtyŋ jüldesı üşın qazaq küresınen respublikalyq «Qazaqstan Barysy» turnirınıŋ ūiymdastyruşylary biylǧy finaldyq synnan bes baluannyŋ şettetılgenın resmi türde mälımdedı.
Jarysqa qatysu erejesın būzǧany üşın Qostanai oblysynda ötken III ırıkteu kezeŋınıŋ jeŋımpazy Ǧabit Balǧynbaev finalǧa qatysu qūqyǧynan aiyryldy. Reglamenttegı erejege säikes, turnirdegı ärbır baluan mındettı türde ırıkteu jarysyndaǧy barlyq kezeŋge qatysuy tiıs. Al atalǧan paluan jarysqa jarty joldan qosylǧan eken. Sonymen qatar, Balǧynbaevtyŋ bas qalamyzda tırkeude tūrmasa da, Astana qalasyndaǧy ırıkteu kezeŋderıne qatysqany anyqtaldy. Būdan bölek, osyndai sebepterge bailanysty Mihail Tverdohlebov (Qostanai oblysy), Nūrǧali Baitaraqov (Astana qalasy), Manas İmanqūlov (Maŋǧystau oblysy) jäne Damir Qalaqov (Batys Qazaqstan oblysy) esımdı paluandar da biylǧy finaldan syrt qalady. Biylǧy turnirde osylaişa 33 paluannyŋ 28-ı baq synaidy.
Turnirge Astana qalasynyŋ atynan 120 kelılık Arman Äbeuov qatysady. Onyŋ boiy – 190 sm. Turnir aiasynda «Malaisary» degen bürkenşık atpen öner körsetetın Arman 30 mausym künı 32 jasqa tolady.
Qazaq küresınıŋ bolaşaǧyna senetın aǧaiyn qaşanda paluandardy qoldap-qolpaştap otyrǧan. Tıptı basqa sport türlerınıŋ basşylary da öz qatarlarynan qazaqşa kürestıŋ jılıgın şaǧyp, maiyn ışken jıgıtterdı körgısı keletının baiqap jürmız. Solardyŋ bırı – Djiu-djitsu federasiiasy men Qazaqstannyŋ MMA prezidenti Anatolii Kim. Onyŋ aituynşa, MMA sportynda Qazaqstan qūramasy auyr salmaqtaǧy sportşylardan tapşylyq körip otyr.
«Olardyŋ sany sonşalyqty köp emes. «Qazaqstan Barysy» jobasyna qatysuşy jigitter bızge qyzyǧuşylyq tanytsa, eşqaşan qarsy bolmaimyn. MMA bizdiŋ paluandarymyzǧa jol aşady. Myqty paluandar Qazaqstanda jetkilikti, adami resurstar öte jaqsy, sporttyq baza bar. Biz osyndai chempiondarymyzdan qarajatymyzdy aiamaimyz. Bolaşaqta Fedor Emelianenko syndy älemdik deŋgeidegi ūlttyq batyrlar şyǧady dep esepteimiz» dedi Anatolii Kim.
