Futboldan Qazaqstan chempionatynyŋ premer-ligasynda bırınşılık aiaqtalmai-aq jeŋımpaz komanda anyqtaldy. «Qaisar» komandasyn 3:0 esebımen ūtqan «Astana» 2014 jylǧy Qazaqstan chempiony ataǧyn jeŋıp aldy. Aldaǧy jyly «Astana» Europanyŋ Chempiondar ligasynda el namysyn qorǧaityn bolady.
Osyǧan deiın kümıs te, qola jüldenı de qanjyǧasyna bailaǧan astanalyq klub öz tarihynda tūŋǧyş ret altyn medal iegerı atanyp otyr. «Astana Arena» stadionynda ötken 31-ınşı tur oiynynda Qyzylorda futbolşylaryn qabyldaǧan «Astana» komandasy qarsylastar qaqpasyna jauapsyz üş dop soǧyp, älı de altynnan dämelı bolyp jürgen «Qairattyŋ» ümıtın bırjola üzdı. Olai deitınımız, almatylyqtar soŋǧy oiynda «Aqtöbe» komandasynan 0:1 esebımen ūtylyp qaldy. Osylaişa ekı üzdıktıŋ arasynda tört ūpai alşaqtyq paida boldy. Būl – endı «Astanaǧa» eşkım jete almaidy degen söz. Al kümıs pen qola jüldenıŋ taǧdyry soŋǧy turda şeşıletın bolady.
Premer-ligamen qoştasatyn Semeidıŋ «Spartak» komandasy bola ma dep oilaimyz. Al bırınşı liganyŋ ekınşı oryn alǧan komandasymen plei-off oiyndaryn ötkızetın komandalardyŋ qatarynda «Jetısu», «Taraz» jäne «Tobyl» bar. Sūrmergender bäsekesınde äzırge qarsylastar qaqpasyn 15 ret däl közdegen «astanalyq» Foksi Ketevoama bolyp otyr.
Soŋǧy turda, iaǧni, 9 qaraşa künı «Qairat» – «Astana», «Ordabasy» – «Aqtöbe», «Qaisar» – «Şahter», «Taraz» – «Spartak», «Atyrau» – «Tobyl», «Jetısu» – «Ertıs» komandalary özara kezdesedı. Al oǧan deiın 5 qaraşa künı Europa ligasyndaǧy oiyndarǧa bailanysty ötkızılmei qalǧan «Aqtöbe» – «Astana» matchy ötetın bolady.
Qazaqstan chempionatynyŋ bırınşı ligasynan joǧary topqa Kökşetaudyŋ «Oqjetpes» komandasy aldyn ala şyǧyp qoidy. Al, premer-liganyŋ 11-ınşı komandasymen bırınşı ligadan «Astana-1964» komandasy «jekpe-jekke» şyǧatyndai mümkındıgı bolyp tūr.
Sonymen futboldan Qazaqstan chempiondary aldyn ala anyqtaldy. Premer ligada – «Astana»! Bırınşı ligada – «Oqjetpes»!
Daiyndaǧan: Ǧalym QOJABEKOV
