«Qoljetımdı baspana» baǧdarlamasy boiynşa qūjat qabyldau bastalady degelı jūrtşylyqta maza joq. Olardyŋ köŋılın küptı etken sūraqtar da barşylyq. Sonyŋ bırı – jyljymaityn mülıkke menşık ülesı bar jastar atalmyş baǧdarlamaǧa qatysa ala ma degen saual. Būl turaly Astana qalasy Tūrǧyn üi basqarmasy basşysynyŋ orynbasary Ruslan Ahmetovten bılgen edık.
Elordalyq basqarma basşysynyŋ orynbasary habarlaǧandai, ata-anasynyŋ päterıne menşıktık qūqyǧy bar jastar «Qoljetımdı baspana» baǧdarlamasyna qatysa alady. Jyljymaityn mülıkke ülestık menşıgı oǧan eş kedergı emes.
– Elımızdıŋ «Tūrǧyn üi qatynastary» zaŋy boiynşa, memlekettık baǧdarlamaǧa qatysuǧa niettı jas jūptardyŋ bırınde jyljymaityn mülkı, iaǧni, jekemenşık üiı bolsa, onda ol memlekettık baǧdarlamaǧa qatysyp, üi ala almaidy. Al, qandai da bır jyljymaityn mülıkke, mysaly, ata-anasynyŋ päterıne menşık ülesı bolsa, onda baǧdarlama boiynşa üi aluǧa qūqysy bar. Ol üşın «Qoljetımdı baspanaǧa» qatysu kezınde qūjattar tızımıne jyljymaityn mülıktı ielenuge ülesı bary jönındegı zaŋdyq qūjatty qosu kerek. Eger negızgı ülesker – baǧdarlamaǧa qatysuşy bolsa, onda oǧan arendalyq üi beruden bas tartylady, – deidı Ruslan Ahmetov.
Taǧy da eskerte keteiık, «Qoljetımdı baspana» baǧdarlamasy boiynşa jas otbasylar tiıstı qūjattardy 2-14 mausym aralyǧynda qaladaǧy Halyqqa qyzmet körsetu ortalyqtarynda tapsyra alady. Baǧdarlamaǧa qatysuǧa ümıttı jūptardyŋ jasy 29-ǧa jetpegen boluy kerek. Ärı nekede kemı ekı jyl tūruy tiıs. Astanada tırkelgen uaqyty da kemı ekı jyl boluy şart.
Qymbat NŪRǦALİ
