Astanalyq Svetlana Iаruşevskaia 27 jyldan berı qoǧamdyq kölık jürgızuşısı bolyp ıstep keledı. Trolleibusty körgennen keiın ol jürgızuşı boludy armandaidy. Tehnikumda oqyp jürıp, 21 jasynda kurstardy tämamdap, jürgızuşı kuälıgın alady. Köp jyl ötse de, Svetlana süiıktı käsıbın tastaǧan emes.
Trolleibus parkı jabylǧan soŋ Svetlana №2 avtobus parkınde segız jyl ısteidı. Al tört jyl būryn jürgızuşı bolyp №1 avtoparkke auysty.
Künde taŋerteŋ dispetcher jürgızuşılerge jol qaǧazyn beredı, al feldşer auysym aldynda medisinalyq tekseru jürgızedı.
Sodan keiın jürgızuşıler tūraqqa baryp, öz avtobustaryna otyrady. Aita keterlık jait, bır kölık ekı jürgızuşınıŋ atyna tırkeledı, olar ol üşın tolyq jauapty bolady. Jolǧa şyqpas būryn maşinalardy kezekşı mehanik qarap şyǧady.
– Jūmysqa 15 minuttyŋ ışınde jinalamyn. Senesız be? Keide boianyp ta ülgermeimın. Avtobusta boianamyn. Erte kelıp, jol qaǧazyn alamyn. Konduktormen soŋǧy aialdamaǧa jetken soŋ bırge kofe ışemız. «Bärı de jaqsy bolady» degen oimen jolǧa şyǧamyz, – deidı ol.
Svetlana üşın jūmystaǧy ūjymnyŋ maŋyzy zor. Onyŋ aituynşa, ärıptesterı oǧan basqaşa qaraidy, kölık juǧanda, jöndegende kömektesedı. Tıptı, jolauşylar da, äsırese, qariialar ūnatady eken.
– Jolauşylarmen äŋgımelesetın ädetım bar. Jeŋıl kölıkpen jürıp te kördım, tük şyqpady. Maǧan ülken kölık kerek. Şarşasam da, jūmysymdy jaqsy köremın. Bır ai boiy demalǧannan keiın bırınşı künı jüregım dürsıldep, jūmysymdy saǧynǧanymdy tüsınemın! – deidı Svetlana Iаruşevskaia.
Svetlananyŋ taǧdyr qosqan küieuı de №2 avtoparkte bas injener bolyp ısteidı.
– Keide demalys künderı balyq aulauǧa şyǧamyz. Tabiǧat aiasynda demalǧandy ūnatamyn, – deidı ol.
Aita keteiık, elordalyq qoǧamdyq kölıkterde 1473 jürgızuşı jūmys ısteidı, sonyŋ ışınde jeteuı – äiel.
astana.gov.kz
