Syrt közge tym qarapaiym, ūiaŋ bolyp körıngenımen, tıldese kele, ışkı jan düniesınıŋ tazalyǧymen köpşılıktı özıne baurap alatyn osy bır aqsary kelınşektı Astananyŋ baiyrǧy tūrǧyndary jaqsy bıledı. Äsırese, jergılıktı aqyn, jazuşylar men jurnalisterge onyŋ esımı etene jaqyn. Öitkenı, Rauşan Doshojina – ömırınıŋ qyryq jylyn baspasözben bailanystyrǧan ardaqty da asyl jan.
Ol – köp şyǧarmanyŋ alǧaşqy oqyrmany. Siiasy keppegen düiielerdıŋ basym bölıgı aldymen Rauşan apaidyŋ aldyna kelıp tüsetın. Qalamgerlerdıŋ ol kısını ızdeitını de tegın emes. Sebebı kez kelgen adamnyŋ qolmen jazǧanyn jazbai tanityn qazaqtıldı sauatty terımşı ol kezde neken-saiaq edı.
Osy öŋırde tuyp-ösıp, Selinogradtaǧy №2 käsıptık-tehnikalyq uchilişenı oidaǧydai tämamdaǧannan keiın ol Aqmola oblystyq atqaru komitetınıŋ baspahanasyna jūmysqa ornalasady. Ol kezde nebary on toǧyz jasta edı. Mıne, Rauşan Doshojinanyŋ da sodan bergı ömırı baspasözben bailanysty.
– Ol kezde baspahananyŋ jūmysy qazırgıdei emes, qiyn bolatyn. Bärın qolmen teretınbız. Tünnıŋ bır uaqytyna deiın üstı-basym şaŋ, mai bolyp baspahanada jüretın kezderım esıme tüsse, qazırgı jastar qandai baqytty dep oilaimyn. Bügınde bärı kompiuterlendırılgen. Bızdıŋ kezımızdegıdei emes, qiyndyq ta az,- deidı R.Doshojina.
Jūmysyna jauapty, özıne tapsyrylǧan ıstı tiianaqty atqara bıletın jas maman köp ūzamai baspahanadan oblystyq partiia komitetınıŋ organy – būrynǧy «Kommunizm nūry», qazırgı «Arqa ajary» gazetınıŋ redaksiiasyna auystyrylady. Sol tūsta būl jerde O.Älıbekov, M.Hasenov, J.Äbdıhalyqov, J.Jaǧyparov, B.İmaşev, T.Ildebaev, A.Jūmabekov syndy osy öŋırdıŋ kıl myqty jurnalist-jazuşylary jūmys ısteitın. Solardyŋ qolmen jazǧan dünielerın maşinkada basady. Ol kezdegı adamdardyŋ köbınıŋ jazuy da tep-tegıs, kelıstı edı. Ärine, arasynda aibaq-saibaqtary da kezdesıp jatatyn. Soǧan qaramastan, Rauşan apai bärın de tap-tūinaqtai etıp, tyq etkızıp basyp beredı. Tıptı, keide üilespegen söilemderdı özı jöndep jıbergen kezderı de az emes. Ondaida gazettıŋ jauapty hatşysy bolǧan Bäduän aǧa «Bızdıŋ Rauşan bärın bıledı» dep arqasynan qaǧyp qoiatyn.
Oblys ortalyǧy Kökşetauǧa köşırılıp, «Arqa ajary» sol jerden şyǧatyn bolǧan tūsta otbasy jaǧdaiymen Astanada qalyp qoidy. Keiın elordanyŋ respublikaǧa taralatyn «Astana aqşamy» gazetıne operator-teruşı bolyp jūmysqa ornalasqan ol mūnda da özınıŋ ūqyptylyǧymen, tiianaqtylyǧymen erekşelendı.
Ǧūmyrynyŋ barlyq maǧynaly jyldaryn baspasöz salasyna arnaǧan Rauşan apaidy sonau ötken ǧasyrdyŋ toqsanynşy jyldarynyŋ basynan bastap bılemın. Sodan berı, mıne, şirek ǧasyrdan asyp barady. Apaimen qyzmettes bolǧan jyldarda ol kısınıŋ artyq söilemeitındıgın, öz jūmysyna myǧym, böten mınezınıŋ joq ekenın baiqadym. Qandai şaruaǧa bolmasyn tap-tūinaqtai. Jinaqylyqty qatty ūnatady. Sol qasietınen älı de tanbai keledı. Eşkımnıŋ ala jıbın attamady. Adal eŋbek ettı. Aramdyqtan ada, dostyqqa adal, jūmysty janymen atqaratyn Rauşan apaidy ärıptesterı de erekşe qūrmet tūtady. Sebebı, ol kez kelgen taqyrypty iırıp äketedı. Köpşıl, jiyn-toidyŋ körkı, qoŋyr dauysymen syzyltyp än salǧanda tamsanyp, taŋdai qaqpaityndar kemde-kem.
– Adaldyqty anamnan üirendım, – deidı apai. – Bır mekemede osynşa uaqyt eŋbek etıp otyrǧanym da anamnyŋ tärbiesınıŋ arqasy dep oilaimyn. Eşqaşan dünie quǧan joqpyn, baiudy, zäulım sarai salǧyzudy mūrat tūtpadym. Qarapaiym tırşılıgıme täube dep, aq nanymdy adal jeudı baqyt sanadym. Atamyz Qoja, dıni sauatty kısı bolǧan eken. Sol kısınıŋ imani uaǧyzdaryn estıp öskendıkten bolar, jastaiymyzdan qarapaiymdylyq, adaldyq, eŋbekqorlyq, meiırımdılık degen sözder sanamda jattalyp qaldy.
Bır salada taban audarmastan qyryq jyl eŋbek etse de, ol kısı şarşadym, qajydym dep körgen jan emes. Kerısınşe, jastardy jıgerlendırıp, armandaryn asqaqtatyp, qanattandyryp otyrady. Sol üşın redaksiianyŋ ülkenı de, jasy da ony erekşe jaqsy köredı. Osy jyldar aralyǧynda segız bas redaktormen qyzmettes bolyp, olardyŋ bırde-bırımen şäi despei, qoian-qoltyq jūmys ısteuı de sol qasietınıŋ arqasynda bolsa kerek.
Ömırlık jary ekeuı Ainūr, Roza esımdı qyzdar ösırdı. Bügınde äje atanyp, nemeresınıŋ qyzyǧyna kenelıp otyrǧan apaidyŋ älı talai tuyndyǧa tūŋǧyş oqyrman atanary anyq. Tek, Alla quat bersın deiık.
Gülbarşyn ÖKEŞQYZY
