Bügıngı Astanada – keşegı Aqmolada bır kezderı auyl şaruaşylyǧy tehnikasyn şyǧaryp, qarqyndy jūmys ıstegen «Qazaqselmaş» zauyty boldy. Būl käsıporyn öz önımderın alyp Odaq ışınde ǧana taratpai, Bolgariia, Chehoslovakiia, Iýgoslaviia, Moŋǧoliia syndy memleketterge jıberıp otyrdy. Qala tūrǧyndarynyŋ ülken bölıgı atalǧan zauytta eŋbek ettı.
Ötken ǧasyrdyŋ seksenınşı jyldary jasy on segızge endı ǧana tolyp, Altyn atty boijetkenmen şaŋyraq qūryp ülgergen Beisenbai Tauşev te osy käsıporynǧa jūmysqa keldı. «Qol qusyryp, bos jata almadym. Üilengennen keiın jauapkerşılıktı sezıne bastadym. Otbasyn asyrau kerek degendei. Zauytta bız negızınen tūqym sebetın maşinalardy jasadyq» deidı özı sol jyldardy eske alyp.
Osy zauytta baqandai on jyl jūmys ıstedı. Öndırısten qol üzbei dänekerleuşı kursyn da bıtırıp aldy. Jastyǧyna qaramai, ūjym ışınde syily azamatqa ainaldy. Basşylardyŋ da nazaryna jaqsy jaǧynan ılıktı. Oǧan dälel – köptegen Alǧys hattary jäne suretınıŋ Qūrmet taqtasyna ılınuı. Ekı jyl seh komsorgy bolǧany da bar.
Mūnyŋ bärı şaŋyraqta alǧan tärbieden, maidanger äke önegesınen bolar. Äkesı Qasiden 1938 jyly Baianauyldan Aqmolaǧa qonys audaryp, soǧys örtı būrq ete qalǧanda osy jerden maidanǧa şaqyrylǧan.
«Mäskeudı jaudan qazaqtar qorǧap qaldy» dep jatamyz ǧoi, solardyŋ arasynda keiıpkerımızdıŋ äkesı de bar edı. Mäskeu tübındegı jaumen keskılesken şaiqastarda auyr jaralanyp, elge qaitarylǧan Qasiden Tauşev Aqmolaǧa oralǧan soŋ jylqy zauytynda eŋbektendı. Byltyr esımı «Ūly Otan soǧysynyŋ ardagerlerı» kıtabyna engızıldı.
Osyndai äkeden önege alǧan Beisenbai 1962 jyly Selinograd qalasynda düniege keldı. Sondyqtan, ony «naǧyz astanalyq» dep atauǧa bolady. Balalyq şaǧy Esıldıŋ suyna şomylumen, jalaŋ aiaq jar keşumen öttı.
Ötken ǧasyrdyŋ toqsanynşy jyldardaǧy daǧdarys elge auyr tidı. Köptegen käsıporyndar jabylyp, özgelerı jarym-jartylai jūmys ıstedı. Beisenbai eŋbek etken zauyt ta sonyŋ kebın kidı. Jalaqy dūrys tölenbei, köptegen jūmysşylarynan aiyryldy. Ol kezde Beisenbai men Altyn Ermek, Serık, Berık atty üş ūldy ösırıp jatqan. Jalaqynyŋ mardymsyzdyǧynan özgelerı sekıldı osy şaŋyraqtyŋ iesı de üirenşıktı jūmysyn tastauǧa mäjbür bolyp, «Selinenergo» mekemesıne auysty. «Ol jyldary audandardy aralap, ünemı ıssaparda jüretınbız. Men qūrylys uchaskesınde eŋbektendım» deidı keiıpkerımız.
Qūrylys jūmystaryna sol uaqytta şyŋdala bastady. «Selinenergodan» keiın bırneşe käsıporynda jürıp, näpaqa tapty. Solardyŋ bırı – «Astana-Teplotranzit» AQ.
Qazır «Stroikontrakt» JŞS-nde dänekerleuşıler brigadirı. Būl kompaniia aty aityp tūrǧandai, qūrylys jūmystarymen ainalysady. Qazır biyl tapsyryluǧa josparlanǧan maŋyzdy nysan – Jekpe-jek saraiyn saluda. Däl Konstitusiia merekesı künı 52 jasqa tolatyn, üş ūlynan da nemere körıp otyrǧan Beisenbai da onyŋ saltanatpen boi köterıp, Astana ajaryn aişyqtai tüsuıne öz ülesın qosuda.
Amanǧali QALJANOV
