21-22 qazan künderı Nūr-Sūltan qalasynda «İntellektualdy daryndy jastar – elordalyq bılım berudıŋ basty äleuetı» halyqaralyq ǧylymi-praktikalyq konferensiiasy öttı.
Tärbielık mänı zor atauly şaranyŋ ūiymdastyruşysy – Nūr-Sūltan qalasy äkımdıgınıŋ «Astana daryny» daryndylyqty damytu jäne psihologiialyq süiemeldeu ortalyǧy. Konferensiianyŋ maqsaty – reseilık jäne respublikalyq mūǧalımder arasyndaǧy serıktestık pen konstruktivtı özara qarym-qatynasty damytuǧa üles qosu. Jiyn barysynda joǧary oqu oryndary, bılım beru mekemelerı men oqu ortalyqtary arasyndaǧy neǧūrlym tiımdı bailanys tetıgın tabu, daryndy balalarmen jäne qabıletı joǧary talantty jastarmen jūmys ısteu, ata-analardy balalarmen bırlesken şyǧarmaşylyq qarym-qatynasqa tartu mäselelerı talqylandy.
Şaraǧa otandyq jäne reseilık ǧalymdar, «Daryn» aimaqtyq ortalyqtarynyŋ, bılım bölımderınıŋ, mamandandyrylǧan mektepter men oqu ortalyqtarynyŋ ökılderı qatysty. Reseilık ǧalymdar jiynǧa onlain qosyldy. Konferensiia jūmysyna barlyǧy 200-den astam delegat atsalyssa, sonyŋ 70-ı – är aimaqtan kelgen ökılder.
– «Daryn» ortalyǧy elımızdıŋ är aimaǧyndaǧy daryndy, ziiatker balalardy qoldau jūmystaryn 23 jyl boiy jürgızıp keledı. Ortalyǧymyzdyŋ küşımen myŋdaǧan mektep oquşylary audandyq, respublikalyq, halyqaralyq deŋgeidegı ärtürlı ziiatkerlık jarystar men saiystarda jeŋımpaz atandy. Bügıngı taŋda älemdık baiqaulardan 500-ge tarta oquşy, eŋ bedeldı 7 halyqaralyq olimpiadanyŋ medalın ielendı. Respublikada 17 ortalyǧymyz, 134 mamandandyrylǧan mektepterımız bar. Solardyŋ bırı elordamyzdaǧy «Astana daryny» ortalyǧy 15 jyldyq mereitoiyn toilauda. Älemdık pandemiianyŋ örşıp tūrǧanyna qaramastan «Daryn» ortalyqtary oqu prosesın onlain jäne aralas formatqa auystyryp ötkızude. Kez kelgen nätije – ärbır oquşy üşın ülken jetıstık. Daryndy jäne qabılettı oquşylarmen jūmys jürgızu, olardy aiqyndau mūǧalım qyzmetınıŋ maŋyzdy aspektılerınıŋ bırı, – dedı Bılım jäne ǧylym ministrlıgı «Daryn» respublikalyq ǧylymi-praktikalyq ortalyǧynyŋ direktory Timur Nūrkeşev.
Konferensiia aiasynda 3 seksiialyq otyrys ötkızıldı, bılım beru salasyndaǧy qazaqstandyq jäne halyqaralyq sarapşylardyŋ 18-den astam baiandamasy tyŋdaldy.
