Adam balasy üşın basqa adamdardyŋ senımıne ie boludan asqan abyroi joq. Biylǧy jyldyŋ basynda, men myŋdaǧan elordalyqtyŋ senımıne ie bolyp, bas qalanyŋ uäkılettı organy – mäslihattyŋ deputaty atandym. Qala şetındegı «İnternasionalnyi», «Michurin», «Küigenjar», «Promyşlennyi», «Temırjolşylar» kentterınıŋ tūrǧyndary öz dauysyn berıp, senımın artty. 32 myŋ adamnyŋ dausynyŋ syrtynda sonşa taǧdyr tūr.
Maǧan okrug tūrǧyndarynyŋ kündelıktı betpe-bet kezdesıp jürgen problemalary jaqsy tanys. Jarty jylǧa juyq uaqytta jüzdegen adammen jüzdesıp, olardyŋ kökeiın tesken mäselelerıne qūlaq türdık. Onyŋ ışınde eŋ bastysy – tūrǧyn üi mäselesı. Osy oraida, Elbasynyŋ biylǧy Joldauyna säikes, Ükımet «Qoljetımdı baspana» baǧdarlamasyn äzırledı. Biyl el aumaǧynda 450 myŋ şarşy metr jaŋa baspana salynady. Baǧdarlamada 2014 jyldan 2020 jyldar aralyǧynda jyl saiyn 1,3 mln şarşy metr päterdı paidalanuǧa beru josparlanyp otyr. Ärine, onyŋ negızgı bölıgı osy Astana qalasynda salynbaq. Osy rette öz basym deputat retınde okrugımdegı qūrylys qarqynyn damytuǧa bar küş-jıgerımdı salamyn dep senımmen aita alamyn.
Bügınde qūrylys jürgızu turaly josparymyz daiyn. Sebebı, bızdıŋ okrugtegı saiajai aumaqtary ysyryluǧa jıberıledı. Tıptı, osyǧan bailanysty tūrǧyndar tarapynan köptegen sūraqtar tuyndap jatyr. Aitatynym, ysyrylu nauqany bastalmas būryn, jergılıktı bilık tūrǧyndardy habardar etetın bolady.
Taǧy bır mäsele – abattandyruǧa qatysty. Astananyŋ tap ırgesınde tūrǧan kentterdıŋ tūrǧyndary joldarynyŋ sapaly, köşelerınıŋ jaryq, ışetın suy taza bolǧanyn qalaidy. Būl atalǧandardyŋ barlyǧy «Astana qalasynyŋ 2011-2015 jyldarǧa arnalǧan damu baǧdarlamasynda» közdelgen. Bız, deputattar, būl baǧdarlamanyŋ uaqytynda oryndalyp, nätijesınıŋ sapaly boluyn qadaǧalaimyz. Sol siiaqty densaulyq saqtau salasynyŋ qyzmetıne degen ökpe jiı boi köteredı. Äsırese, ol medisinalyq mamandardyŋ bılıktılıgıne qatysty. Qalada būl mäselenı şeşu baǧytyndaǧy jūmys belsendı jürgızılıp keledı. Sondyqtan, uaqyttyŋ enşısındegı mäsele köpke sozylmai nätije beredı dep sendırgım keledı.
Halyqpen jūmys ısteitın adam bırınşı kezekte sol halyqtyŋ sözın tyŋdai bılu kerek. Būlai deitınım, tūrǧyndar köp aitatyn şaǧymnyŋ bırı memlekettık qyzmetkerlerdıŋ jūmysyna tıkelei qatysty. Keibır ortanqol şeneunıkter aldyna kelıp tūrǧan adamnyŋ sözın tyŋdamai, olardyŋ ötınışıne qūlaq aspaidy. Sengen adamynyŋ «siqyn» körgende tauy şaǧylmaǧanda qaitedı? Öz basym qyzmetı men mındetıne salǧyrt qaraityn memlekettık qyzmetkerlerdı jönge salu turaly aldaǧy sessiiada mäsele kötermekpın. Halyq aldyndaǧy paryzyn nege adal atqarmaitynyn sūrau kerek. Sebebı, kez kelgen şeneunıktıŋ belgılı bır oryntaqqa otyruy – halyqtyŋ arqasy. Jalpy, būl mäselege öte mūqiiat boluymyz kerek.
Būǧan qosa, tap qazır halyqtyŋ qūqyqtyq sauatyn arttyru maŋyzdy. Öitkenı, öz qūqyǧyŋdy bılmei, dalaǧa attap basudyŋ özı qiyn. Osy oraida, bız jaqynda jekemenşık notarialdyq kompaniiamen zeinetkerlerge tegın keŋes berıp otyruǧa kelısım jasadyq. Zeinet jasyndaǧy adamdardy bölıp alǧanymyz, köbıne-köp egde jastaǧy adamdar qūqyqtyq kömekke zäru.
Tıze bersek, özektı mäsele köp. Bıraq, dıttegenım, ony jıpke tızgendei sanap beru emes. Aitqym keletını, jetkızbeitın maqsat joq. Bızdıŋ de – Astanany ajarly, halqynyŋ äl-auqatyn jaqsy etemız degen josparymyz da köp ūzamai oryndalady. Eŋ bastysy, halyq öz qalaulylarymen bırge bolyp, olardyŋ igı bastamasyna qoldau bıldırıp otyrsa, bolǧany. Öitkenı, bız, deputattar, el üşın eŋbek etemız.
Töken EGINBAEV, mäslihat deputaty
