Elordada 18 qazan – Ruhani kelısım künıne orai dästürlı jiyn öttı. Jiynǧa halyqaralyq konferensiia jūmysyna otandyq jäne şeteldık sarapşylar qatysty. Qoǧamdy ūlty men dınıne qaramastan bırıktıruge, tūraqtylyq pen kelısımdı saqtauǧa jäne odan ärı damytuǧa baǧyttalǧan şara qatysuşylary ūtymdy pıkırlerı men oramdy oilaryn ortaǧa saldy.
Osydan 29 jyl būryn däl osy künı Qazaqstan Respublikasynyŋ Tūŋǧyş Prezidentı – Elbasy Nūrsūltan Nazarbaevtyŋ bastamasymen Almatyda ötken Bırınşı bükılälemdık ruhani kelısım kongresınde qatysuşylar 18 qazandy Ruhani kelısım künı dep jariialauǧa şaqyrǧan manifest qabyldaǧan edı. Atauly kün qarsaŋynda ötetın būl jiyn dästürge ainalyp ülgergen. Būl jolǧy konferensiia «Qazırgı zamannyŋ syn-qaterlerı jaǧdaiynda konfessiiaaralyq jäne ūltaralyq kelısımdı nyǧaitu» taqyrybynda öttı.
Şarany Nūr-Sūltan qalasynyŋ äkımdıgı, Konfessiiaaralyq jäne örkenietaralyq dialogty damytu jönındegı N.Nazarbaev ortalyǧy jäne Nūr-Sūltan qalasy Dın ısterı jönındegı basqarmasy, Dınderdı zertteu ortalyǧy ūiymdastyrdy. Konferensiiaǧa Parlament mäjılısı deputattary, Qazaqstan halqy assambleiasy, ortalyq memlekettık organdar ökılderımen qatar, Resei, AQŞ, Päkıstan, İndiia, Livan, Qyrǧystan, sondai-aq özge de elderden belgılı memleket jäne qoǧam qairatkerlerı, dıni bırlestıkter, azamattyq qoǧam instituttary men ǧylymi qoǧamdastyq ökılderı jäne halyqaralyq sarapşylar qatysty.
Konferensiiada alǧaşqy bolyp elorda äkımınıŋ orynbasary Ashat Oralov söz aldy. Ol qatysuşylardy erekşe yqylaspen qarsy alyp, dästürlı şaranyŋ ūltaralyq jäne dınaralyq kelısımnıŋ özektı mäselelerın talqylauǧa mümkındık beretın bıregei alaŋ ekenın basa aitty.
«Bız qala äkımdıgınde elımızdegı aituly datalardyŋ bırı – Ruhani kelısım künıne orai jinalyp otyrmyz. Azamattarymyzdyŋ dıni senım erkındıgı men bostandyǧy Qazaqstan Respublikasynyŋ Konstitusiiasymen bekıtılgen. Dınaralyq kelısım – qoǧam ömırındegı maŋyzdy jetıstıkterdıŋ bırı jäne bıregeiı. Būl kün bügınde öte ülken maŋyzǧa ie. Elbasynyŋ bastamasyn jalǧastyryp, bügınge deiın atap ötıledı, bükılälemdık jiyndar ötkızılude. Dünie jüzı elderı Qazaqstanda Ruhani kelısım künınıŋ baryna asa qyzyǧuşylyq tanytady» dedı qala äkımınıŋ orynbasary.
Eldegı Ruhani kelısım künınıŋ bastauynda bolyp, osy qūndylyqtardyŋ qazaq qoǧamynda maŋyzdy oryn aluyna eŋbek sıŋırgen Tölegen Mūhamedjanov atauly künnıŋ tarihyna toqtalyp, ruhani mädeniet ideiasynyŋ bügınnıŋ belgısıne ainalǧanyn alǧa tartty. «Beibıtşılıkke mädeniet arqyly» halyqaralyq qauymdastyǧynyŋ prezidentı, Qazaqstan Respublikasynyŋ eŋbek sıŋırgen qairatkerı, kompozitor, qoǧam qairatkerı öz sözınde ruhani kelısımnıŋ eldegı ahualǧa äserın de atap öttı.
«Bügın älemde bolyp jatqan şielenıster men oqiǧalar örkenietter daǧdarysyna, alyptar arasyndaǧy dauǧa ūlasyp jatyr. Osy rette bızdıŋ qoǧamdaǧy biık ruhani qūndylyq elımızdıŋ odan ärı tūraqty örkendeuıne, Qazaqstan tūrǧyndarynyŋ beibıt ömır sürıp, jan-jaqty damuyna, halyq igılıgıne eŋbek etuıne mümkındık berıp otyr. Būl dästürdı saqtap qalu – bızdıŋ basty paryzymyz. Öitkenı bızge qarap boi tüzeitın memleketter köp» dedı T.Mūhamedjanov.
Bügıngı taŋda Qazaqstanda 40 türlı konfessiia men 130-ǧa juyq etnos ökılderı tūrady. Elımızde 3200-ge juyq dıni ǧimarattar, 4000-ǧa juyq dıni bırlestıkter jūmys ısteidı. Jiynda söz alǧan basqa da qatysuşylar memlekettık-konfessiialyq jäne konfessiiaaralyq qatynastar salasyndaǧy özektı mäselelerdı, jalpyūlttyq ideia negızınde qazaqstandyq bıregeilıktı nyǧaitu mındetterın, sondai-aq elımızde jäne älemde dınaralyq dialog pen özara tüsınıstıktı ılgerıletudegı azamattyq qoǧam rölın talqylady.
