Astana qalasynyŋ äkımı Äset İsekeşev pen «Damu» qorynyŋ basqarma töraǧasy Qanyş Töleuşin tiıstı memorandumǧa qol qoidy. Qūjatqa säikes, elorda äkımdıgı men «Damu» qory paritettı negızde bölşek sauda, meiramhana biznesı, azyq-tülık jetkızu qyzmetı salalarynda jäne franşizalar satyp alu üşın şaǧyn jäne orta bizneske 600 million teŋge böledı.
Qarjy ekınşı deŋgeilı bankter arqyly berıledı. Jyldyq syiaqy mölşerlemesı – 8,5%. Nesienıŋ eŋ köp mölşerı – 200 mln teŋgege deiın. Nesie beru merzımı – 84 ai. Ainalma qarjyny tolyqtyru üşın nesie merzımı 36 aiǧa deiın bolady. Negızgı qaryzdy öteu boiynşa jeŋıldıktı kezeŋ – 18 aidan aspaidy.
– Astana zamanaui megapoliske ainalyp keledı, qala ekonomikasynyŋ aitarlyqtai bölıgın servistık sektor qūraidy. Qazırgı kezde elorda EKSPO-2017 körmesın ötkızuge daiyndyq üstınde. Jergılıktı halyq pen turister üşın servistı odan ärı damytyp, bölşek sauda, meiramhana biznesın, qyzmet körsetu türlerın jaŋa zamanaui deŋgeige şyǧaru maŋyzdy. Sondyqtan «Damu» qorymen bırge osy baǧyttaǧy bırqatar baǧdarlamalardy ıske qosamyz, – dedı qala basşysy Äset İsekeşev.
– Astana äkımdıgımen jasalǧan kelısım şaǧyn jäne orta bizneske qolaily jaǧdailar jasauda megapolis üşın maŋyzdy bolyp tabylady. Statistikalyq mälımetterge säikes, Astana qalasy ŞOB damytu körsetkışterı boiynşa aldyŋǧy qatarda. Bügınde qalada 104 myŋ käsıporyn jūmys ısteidı. Olar 3,2 trln teŋgenıŋ önımın şyǧarady. Şaǧyn jäne orta biznespen ainalysatyndardyŋ ülesı boiynşa Astana respublika boiynşa ekınşı orynda tūr. Būl qala halqynyŋ 62 paiyzyn qūraidy. Äkımdıkpen bırlesıp qolǧa alynatyn baǧdarlamalar osy ŞOB ösımınıŋ oŋ ürdısın saqtauǧa jäne jaqsartuǧa baǧyttalǧan. Bır jaǧynan, nesie boiynşa jeŋıldıktı şarttar – jyldyq 8,5 paiyz – elordada bärıne belgılı brendterdıŋ paida boluyna nemese servistı jaŋa deŋgeige köteruge mümkındık beredı, al EKSPO-2017 qarsaŋynda būl öte maŋyzdy, – dedı «Damu» qorynyŋ Basqarma töraǧasy Qanyş Töleuşin.
