On bır jyl boiy ozat oqyp, üzdık ülgerım körsetken 294 elordalyq tülek «Altyn belgı» iegerı atandy. Bılımdı jetkınşekterdı Nūr-Sūltan qalasynyŋ äkımı Altai Kölgınov marapattady.
Talaptyŋ tūlparyn mınıp, tas qiiaǧa örlegen ūl-qyzdar üşın ūiymdastyrylǧan «Elorda maqtanyşy» atty saltanatty keştıŋ atmosferasy mülde erek boldy. Jiyn barysynda şahar basşysy:
– Biyl 6274 astanalyq oquşy mektep bıtırıp, ömır joldaryndaǧy alǧaşqy belestı baǧyndyrdy. Onyŋ 294-ı – «Altyn belgı» iegerlerı. Senderdı alda talai özgerıster men jaŋaşyldyqtar kütude. Onyŋ bärı ärqaşan batyl qadamdarǧa, qai salada bolmasyn jetıstıkterge jeteleidı, – dep jas tülekterge ülken senım arta söiledı.
«Altyn belgı» iegerlerınıŋ sany boiynşa №1 mektep-lisei – alǧaşqy orynda. Onda 16 tülek atalǧan marapatqa ie boldy. Odan keiıngı oryndarda №48 (13 tülek), №69 (11 tülek), №62 (11 tülek), Nūr-Orda (11 tülek), №61 (9 tülek) mektepter men daryndy qyz balalarǧa arnalǧan Bılım-innovasiia liseiı (9 tülek) tūr.
Sondai-aq Altai Kölgınov mektep mūǧalımderınıŋ eŋbegın de eleusız qaldyrmady. Elorda äkımı bügınde qaladaǧy 93 myŋdai şäkırt türlı olimpiadalar men ziiatkerlık jarystaryna qatysyp jürgenın, ötken oqu jylynda respublikalyq jäne halyqaralyq deŋgeidegı baiqaularda 107 altyn, 167 kümıs jäne 180 qola – jalpy sany 424 medaldı qanjyǧaǧa bailaǧanyn erekşe atap öttı. Sondai-aq qala basşysy būl körsetkışter elordadaǧy 17 myŋ ūstazdyŋ jemıstı eŋbegı ekenın de aitty.
