QR Bilim jäne ǧylym ministrliginiŋ türki akademiiasynda «Türki halyqtarynyŋ ejelgi ädebi jädigerlikteri jäne Nemat Kelimbetov şyǧarmaşylyǧy» taqyrybynda ǧylymi-täjiribelik konferensiia boldy. Ǧalymdar, qalamger şyǧarmaşylyǧyn är qyrynan taldap, onyŋ ölmes mūrasyna laiyqty baǧa berdi.
Elimizde – «Qūrmet» ordenimen (2001 jyly), halyqaralyq därejede –F.Kafka atyndaǧy Europa qoǧamynyŋ altyn belgisimen (2010 jyly) marapattalǧan Nemat Kelimbetov – türkitanuşy-ǧalym, jazuşy, sonymen qatar, qoǧam qairatkeri. Taǧdyry tauqymet üstinde ötse de, qalamger eşqaşan moiymaǧan. Otyz bes jasynda kürdeli ota jasatqannan keiin ūzaq jyldar boiy auru azabyn tartty. Äitse de, tūlǧalyq iriligin saqtai bildi. Tän azabyn tartyp, jany qinalǧan jyldaryn da adam ruhyn janityn keremet körkem düniege ainaldyrdy.
Ǧūmyrynda «taǧdyrdyŋ dauyly soqqan kezde tamyry tereŋ adam ǧana ūşyp ketpei, aman qalady» dep, bolmys biiktigi men tanym tereŋdigine ūmtylǧan ol qazaq ädebietine tyŋnan türen salǧan. Kültegin däuirinen be-rirekten bastalyp jürgen ädebiet tarihyn sonau saq, ǧūn däuirine deiin tartty. Solaişa, öziniŋ ǧylymi däiekti eŋbekterimen qazaqtyŋ bertinde ǧana paida bolǧan, tamyrsyz halyq emes ekenin, qazaq tarihynyŋ, ädebiet tarihynyŋ san ǧasyrdy qamtitynyn däleldedi. Sol eŋbektiŋ jemisi – «Ejelgi däuir ädebieti» büginde studentterdiŋ qolynan tüspeitin oqulyqqa ainaldy.
Jiyn barysynda Şäkir Ybyraev, Ǧarifolla Esim, Sauytbek Abdrahmanov, Şerubai Qūrmanbaiūly, taǧy da basqa qalam qairatkerleri, türkolog-ǧalymdar baiandama jasaǧan. Jazuşy-ǧalymnyŋ şyǧarmaşylyǧyn qamtyǧan kitap körmesi de ūiymdastyryldy.
P.S.
Nemat Kelimbetov 1937 jyldyŋ 4 säuiri küni tuǧan. Közi tiri bolsa, biyl 75 jasqa tolar edi… Tūlǧanyŋ tuǧan künine orailastyrylǧan ǧylymi konferensiiaǧa tūiaǧy – QR Ükimet basşysynyŋ orynbasary Qairat Kelimbetov te kelip qatysty.
Näzira SAILAUQYZY
