Bügıngı taŋda qazaq küresınıŋ bedelı ösıp, öz elımızde ǧana emes, halyqaralyq arenaǧa da şyǧa bastady. Sonyŋ bır aiǧaǧy dep biyl üşınşı jyl qatarynan ötken «Qazaqstan barysy» jarysynyŋ ötkenın aituǧa bolady. Al osy qazaq küresı elordamyz Astanada qandai deŋgeide damyp otyr? Bız osy oraida Qazaqstannyŋ eŋbek sıŋırgen jattyqtyruşysy, halyqaralyq därejedegı töreşı (FİLA), «Astana batyry» jekpe-jek sport klubynyŋ bapkerı Ǧalym Qūlekeşev myrzany äŋgımege tartqan edık.
– Qazırgı kezeŋde Astana qalasynda qazaq küresımen ainalysatyndar qatary şamamen qanşalyqty bolyp otyr, jalpy osy ūlttyq sportymyzǧa degen qyzyǧuşylyq bar ma?
– Ärine, jyl ötken saiyn qyzyǧuşylyq artyp keledı. Jalpy, Astana qalasynyŋ Turizm, dene tärbiesı jäne sport basqarmasyna qarasty «Astana batyry» jekpe-jek sport klubynda boks, kürestıŋ barlyq türlerı, taekvondo sekıldı sport türlerın damytu boiynşa jüielı jūmystar atqarylady. Osy klubtyŋ tärbielenuşılerı respublikalyq jäne halyqaralyq jarystarda tek qana elordamyzdyŋ emes, respublikamyzdyŋ da namysyn abyroimen qorǧap jürgenderın maqtanyşpen aita alamyn.
Al özımızdıŋ ūlttyq sportymyz – qazaq küresı jaiynda aitar bolsam, bügınde qala boiynşa üş jüzge juyq adam tūraqty türde, käsıbi deŋgeide qazaq küresımen ainalysady. Būlardyŋ ışınde jasöspırımder, jastar jäne eresekter de bar. Bapkerler qatarynda Qazaqstannyŋ eŋbek sıŋırgen jattyqtyruşysy, ekı joǧary sanatty bapker jäne bırneşe jas mamandar eŋbek etude. Şynyn aitu kerek, soŋǧy jyldary qazaq küresıne keluşıler qatary köbeiıp kele jatyr. Äsırese, küreske üiırsek balalar köbeiıp keledı. Būl jerde, ärine, «Qazaqstan barysy» jarysynyŋ oŋ yqpaly bolǧanyn aituǧa tiıspız.
– Elordamyzda qazaq küresınen dästürı qalyptasqan jarystar bar ma?
-Jyl saiyn jasöspırımder, jastar jäne eresekter arasyndaǧy Astana qalasynyŋ chempionaty ötıp tūrady. Sonymen qatar, «Bäiterek» jüldesı» degen jarysymyz da bar. Būl elordamyzdyŋ simvoly bolyp tūrǧan «Bäiterek» monumentı janynda, aşyq aspan astynda ötetın jarys. Elımızdıŋ aimaqtarynan da baluandar kelıp qatysady. Osy jarysty aldaǧy uaqytta halyqaralyq deŋgeige kötersek degen oiymyz bar. Är jyldyŋ soŋynda «Täuelsızdıkke tartu» atty aşyq turnir ötkızemız. Būl jarysqa da qatysuşylar jyl saiyn köbeiıp keledı.Elımızdegı eŋ bedeldı jarysqa ainalyp otyrǧan «Qazaqstan barysy» turnirınıŋ ūiymdastyru şaralaryna qatysamyz. Memlekettık jäne ūlttyq merekelerde qazaq küresınen jarys ötkızu dästürge ainalǧan. Osynyŋ bärı Astanamyzda qazaq küresınıŋ damuyna yqpal etude.
– Qazaq küresınen biık jetıstıkterge jetken baluandar jaily aityp ötseŋız.
– Bügıngı taŋda Astana qalasynyŋ namysyn qorǧap jürgen baluandardyŋ qatarynda Qazaqstannyŋ eŋbek sıŋırgen sport şeberı bar. Ol – ekı dürkın älem chempiony, Aziia jäne Qazaqstan bırınşılıgınıŋ bırneşe märte jeŋımpazy Ǧani Seidıldaev. Halyqaralyq därejedegı sport şeberı Erlan Estek, būl jıgıt te älem chempiony bolǧan. Biylǧy el chempionatynda jeŋımpaz atanyp, bügınde Germaniiada ötetın älem bırınşılıgıne daiyndalyp jür. Sonymen qatar, Qazaqstannyŋ sport şeberı ataǧyn 16 baluanymyz ielenıp otyr. Būl sportşylardyŋ bärı de Astanamyzdyŋ namysyn halyqaralyq jarystarda qorǧaityn saŋlaqtar desem bolady.
Ǧalym QOJABEKOV
