Salauatty ömır saltyn ūstanyp, ünemı jaidary jüretın Aisūltan Jaqypbekov öskeleŋ ūrpaqqa önege bolyp jürgen abzal azamattyŋ bıregeiı desek jarasady. Bükıl sanaly ǧūmyryn balalar tärbiesıne arnaǧan ūlaǧatty ūstaz älı de mektepte, älı de mūǧalım…
Aisūltan Tüsıpbekūly qaharly jyldardyŋ balasy, iaǧni Ūly Otan soǧysynyŋ naǧyz qyzǧan şaǧynda 1943 jyly Aqmola qalasynda düniege kelgen eken. Balalyq şaǧy soǧyspen tūspal kelgender jankeştı bolady degen sözdıŋ jany bar ma eken, Aisekeŋ de eŋbekke elgezek bolyp er jettı. Tabiǧatynan balajandy bolǧan azamattyŋ bar oiy mektepte mūǧalım boludy qalaityn edı. Solai boldy da, Aisūltan Tüsıpbekūly ömırınıŋ 45 jylyn jüregı qalaǧan mūǧalım mamandyǧyna arnady.
Qaraǧandy qalasyndaǧy mūǧalımder institutynyŋ dene şynyqtyru fakultetın bıtırgen jas maman eŋbek jolyn auyl mektebınen bastady. Qorǧaljyn audanynyŋ Keŋbidaiyq auyldaǧy segızjyldyq mektepte balalardy sportqa baulydy. Keiınnen tuǧan qalasy Aqmolaǧa oralyp pedagogika uchilişesınde sabaq berdı. Oblystyq bılım beru basqarmasy öz ısıne asa jauapkerşılıkpen qaraityn jas mamandy jergılıktı mūǧalımder bılımın jetıldıru institutyna joldaidy. Bırneşe jyl dene şynyqtyru kabinetınıŋ meŋgeruşısı qyzmetın abyroimen atqardy. Balalar ortasynda jürgendı jany qalaityn Aisūltan aǧa qaitadan mektepke oralǧandy jön sanady. Sodan berı, iaǧni 1994 jyldan berı qala mektepterınde mūǧalım bolyp jemıstı eŋbek etude. Joǧary sanatty ädısker atandy.
– Aisūltan aǧa bızge ärıptes ärı önege bolyp jürgen azamat. Jasy jetpıske tolyp otyrsa da, jūmystan qol üzgen adam emes. Qaşan körseŋız de oquşylardyŋ ortasynda jüredı. Balalar da ony jaqsy köredı. Öitkenı, ol uaqytpen sanaspai jūmys ısteidı. Ol tek qana sabaq berıp qoimaidy, bokstan bapker, toǧyzqūmalaqtan ädısker bolyp ta ülgerıp jür. Osyndai eŋbekqor aǧamen bırge jūmys ısteudıŋ özı bır ǧanibet dep aitar edım, – deidı №62 mektep-gimnaziianyŋ mūǧalımı Saiyn Qūndybaev.
İä, Aisūltan Tüsıpbekūlynyŋ bız älı aitpaǧan taǧy bır qyry bar. Ol – bapkerlıgı. 1962-1965 jyldary Belarus äskeri okrugınde äskeri qyzmetın atqaryp jürgende boksqa qatysyp, bırqatar jarystarda jüldeger atanǧany bar. Äskerden keiın de bylǧary qolǧapty tastamai respublikalyq jarystarda olja salyp jürdı. Osy boksta jinaǧan täjıribesı bapkerlıkke de jeteledı. Köptegen şäkırtterı elge tanyldy. Mäselen, bokstyŋ älıppesın Aisūltan aǧadan üirengen D.Elubaeva, N.Ömırbaeva, L.Abdrahmanova, A.Jūmaǧūlova syndy boksşy qyzdar bügınde respublikalyq jäne halyqaralyq jarystarda jüldegerler qatarynan körınıp jür.
Ūlttyq sportqa da airyqşa qaraityn ūlaǧatty ūstaz toǧyzqūmalaq pen asyq atu sportyn da jandandyruǧa aitarlyqtai atsalysyp jür. Mektepte üiırme jürgızıp, şäkırtterın jarysqa qosady.
Taǧy bır qosarymyz, Aisūltan aǧa elordamyzda ötıp tūratyn būqaralyq sport şaralaryna belsendı qatysuşylardyŋ bırı. Qysta şaŋǧy, jazda jügıru jarystarynan bır qalmaidy. Osyndai sportqa degen qūştarlyǧy jäne jastarǧa körsetıp jürgen önegesı üşın Astana qalasynyŋ Turizm, dene tärbiesı jäne sport basqarmasy men Bılım basqarmasy Aisūltan Tüsıpbekūlyna bırneşe märte alǧys jariialap, marapat körsettı.
Aisūltan aǧa – ūlaǧatty ūstaz ǧana emes, balalaryna önegelı äke, nemerelerıne ardaqty ata bolyp otyrǧan jaidarly jan. Qūdai qosqan jary Gülnar ekeuı ūldaryn ūiasyna, qyzdaryn qiiasyna qondyrǧan baqytty jandar.
Jetpıske kelse de jastar men balalardyŋ ortasynda jürıp, eŋbekten qol üzbei kele jatqan Aisūltan aǧanyŋ ūstanǧan ömır salty kımge bolsa da önege bolatynyna senımdımız.
Ǧalym QOJABEKOV
