Köptegen kürdelı auru türlerı kündızgı stasionarda oŋaltudy qajet etedı. Oŋaltu qyzmetı balaǧa da, eresek adamǧa da türlı diagnoz boiynşa körsetıluı qajet. Negızı är emhanada oŋaltu bölımşesı boluy kerek. Bıraq qazırgı taŋda elordada tolyqqandy oŋaltu bölımşelerı №10 jäne №4, 7, 5 emhanalarda ǧana bar. Sonymen qatar «Jūldyz-ai», «Qamqorlyq» degen siiaqty bırqatar oŋaltu ortalyqtary jūmys ısteidı.
Solardyŋ ışınde eŋ auqymdy oŋaltu bölımşesı qalalyq №10 emhanada on jyldan berı halyqqa qyzmet körsetıp keledı. Atalǧan bölımşenıŋ meŋgeruşısı, reabilitolog därıger Aigül Serıkqyzy asa kürdelı qyzmetterdı kün saiyn qiyn jaǧdaidaǧy adamdarǧa körsetıp jürgen ūjym jūmysy turaly aityp berdı. Emhananyŋ besınşı qabatynda ornalasqan oŋaltu bölımşesınıŋ negızgı mındetı – tolyq emdelıp ketkısı keletın nauqastarǧa kün saiyn ümıt syilau.
– Bızde köptegen medisinalyq oŋaltu qyzmetterı körsetıledı, kündızgı stasionar, APP, üige baratyn mobildı brigadalar bar. Jüre almaitın balalardy jürgızemız. Byltyr bızde kündızgı stasionarda 395 nauqas emdeldı. Olarǧa miokarda infarktı, ONMK, iaǧni mi qan ainalymynyŋ qatty būzyluy, jaraqattan keiıngı oŋaltu, tamyr auystyru, DSP, iaǧi balalar serebraldy sal auruy, tua bıttı damuy tejeluı, Daun sindromy siiaqty aurular boiynşa oŋaltu qyzmetterın körsettık. Sondai-aq Ambulatorlyq emhanalyq kömek boiynşa byltyr bızde 143 919 qyzmet körsetıldı. Oǧan massaj, fizioterapiia, elektrlık emdeu, jaryqpen emdeu jäne t.b. qyzmet türlerı jatady. Apparattar – 2012 jyly alynǧan zamanaui jabdyqtar. Sondai-aq kinezoterapiia bar. LFK, iaǧni beiımdelgen dene şynyqtyru qyzmetı jeke adamdarǧa jäne toptarǧa körsetıledı. Boboterapiia, mehanoterapiia da jūmys ısteidı, oǧan trenajerlar, velotrenajerlar, jügıru jolaqtary jäne basqalar jatady. Sol siiaqty osteohondroz, ota jasalmaǧan synyqtar, pnevmoniia, otitten keiıngı oŋaltu, 3-kezeŋındegı artrozdar oŋaltylady, ortopediialyq em de qarastyrylǧan, – deidı bölımşe meŋgeruşısı.
Mūnda atalǧan emhanada tırkelgen 2 aidan 18 jasqa deiıngı jäne odan ülkender de qaralady. Bölımşe qyzmetkerlerı kün saiyn taŋerteŋgı saǧat 8.00-den 16.00-ge deiın jūmys ısteidı. Jalpy qyzmetterdıŋ 60 paiyzy 18 jasqa deiıngı balalarǧa körsetıledı. Fizioterapevt qyzmetı künıne 30-40 balaǧa körsetıledı. Mamandar ünemı käsıbi bılıktılıgın arttyryp otyrady. Sonymen qatar pedagogikalyq oŋaltu, defektolog, logoped, psiholog, ERG terapevt, AFK siiaqty mamandar oŋaltu qyzmetınıŋ eŋ basynda jüredı. Olar kelgen nauqastarǧa pedagogikalyq korreksiia, autizm, keş söilegen balalar boiynşa jūmystar jürgızedı. Bırqatar aurular üşın tūzdy şahta qyzmetı de bar.
– Jalpy mamandar jetkılıktı, degenmen fizioterapiia boiynşa medbikeler az. Al qala boiynşa reabilitologtar tapşy. Izder bolsaŋ, tabu qiyn. Bızdıŋ bölımşede mamandar 85 paiyz jetkılıktı. Balalar arasynda psihologiialyq söileu damuynyŋ tejeluı boiynşa diagnoz köp kezdesedı. Osyny üiretetın mamandar jetıspeidı. Bölımşede osy salalar boiynşa mamandardy özımız oqytyp, qolda barmen ülgerıp jatyrmyz, – deidı därıger.
Sonymen qatar özderı kele almaityn, öte auyr jaǧdaidaǧy, özge oŋaltu ortalyqtary qyzmet körsetpeitın nauqastardyŋ üiıne baratyn mobildı brigadalar da bar. Olar köbıne boiynda öte auyr katetery bar, nesep joldary aurulary boiynşa oŋaltudy qajet etetın nauqastardy qarap, künıne 3-4 üige barady. Bölımşenıŋ osyndai auqymdy qyzmet türlerın körsetetın medisinalyq personalynyŋ köbınıŋ eŋbek ötılı 16 jyldan asady.
