«EKSPO-2017» halyqaralyq körmesı taiap qaldy. Sonyŋ qarsaŋynda Astanada 10 men 31 mamyr aralyǧynda «Qūqyqtyq tärtıp» jedel-aldyn alu şarasy ötude. Bügınge deiın şara aiasynda qūqyq qorǧau mamandary köşı-qon zaŋnamasyn būzǧan 2 363 şeteldıktı anyqtap, 1130 azamatty äkımşılık jauapkerşılıkke tartyp, 198 adamdy elden şyǧaryp ülgerdı.
Tärtıptık şara şeŋberınde bas qalanyŋ qūqyqtyq qauıpsızdıgı tolyqtai baqylauǧa alynǧan. Elorda äkımdıgınde arnaiy ştab jūmys ısteidı. Oǧan tiıstı mekemelerden jauapty tūlǧalar tartylǧan.
– On kün ışınde bıraz jūmystar atqaryldy. Qylmys jasap ızdeude jürgen 28 adam ūstaldy. Onyŋ 6-y halyqaralyq ızdeude bolǧan. Sonymen bırge bas qalada tırkeude tūrǧan 1079 qaru ielerın qaita tekseruden ötkızıp, zaŋsyz saqtalǧan 32 qarudy anyqtadyq. 17 kg esırtkı tärkılendı. On kün ışınde 421 qylmys aşyldy. Sondai-aq, tūrǧylyqty meken-jaiy joq 329 adam qaladaǧy beiımdeu ortalyǧyna jıberıldı. Tırkelmegen dıni ūiymdardyŋ kıtaptaryna bailanysty 4 faktı tırkeldı. Qysqasy, şara älı jalǧasuda, – dedı Astana qalalyq IID jergılıktı polisiia qyzmetı bastyǧynyŋ orynbasary Gosman Jakin.
Sondai-aq, şara barysynda qūqyq qorǧau qyzmetkerlerı jezökşelıkpen ainalysatyn 200 azamatşany anyqtaǧan. Solardyŋ ışınde qalada tūrǧylyqty tırkeuı joq qyzdardy üilerıne qaitarǧan. Jiyndy qūqyq qorǧau organdarynyŋ jauapty mamandary elorda tūrǧyndary men qonaqtaryn qūqyqtyq tärtıptı qamtamasyz etu boiynşa jürgızılıp jatqan ıs-şaralarǧa tüsınıstıkpen qaraudy jetkızdı.
