Keşe Aqordada Memleket basşysy Nūrsūltan Nazarbaev Qazaqstannyŋ Qaruly küşterı, qūqyq qorǧau organdary men arnaiy qyzmet ökılderıne memlekettık nagradalar tapsyrdy.
– Ūlt pen ūlystyŋ qauıpsızdıgın qamtamasyz etıp, täuelsızdıgımızdı qorǧap, ony qasterleuden asqan märtebe joq. Tatu elımızdegı tūraqtylyq pen tärtıp tūǧyrynyŋ berık boluy özderıŋızge tıkelei bailanysty. Sızder osy salada abyroily qyzmet etıp, azamattyq paryzdaryŋyzdy adaldyqpen atqaryp kelesızder. Qazaqstannyŋ tūraqtylyǧyn, halqymyzdyŋ amandyǧyn elımızdıŋ senımdı sarbazdary küzetıp tūr. Elge qorǧan bolu üşın qajymas qairat, jıgerlı ruh qajet ekenı belgılı. Osylardyŋ barlyǧy sızderdıŋ boilaryŋyzdan tabylady dep oilaimyn. Otanǧa degen qaltqysyz qyzmetımen, eren eŋbegımen erekşelengen sızder bügıngı joǧary marapatqa laiyq bolyp otyrsyzdar, – dedı Elbasy qūttyqtau sözınde.
Saltanatty räsım kezınde QR Qaruly Küşterı «Oŋtüstık» öŋırlık qolbasşylyǧy äskerlerınıŋ qolbasşysy T.Qoibaqov jäne Ūlttyq qorǧanys universitetınıŋ bastyǧy A.Ryspaev II därejelı «Daŋq» ordenımen marapattaldy. Sondai-aq, 8 adamǧa – II därejelı, 3-euıne – III därejelı «Aibyn» ordenı tabys etıldı. Ekı qyzmetker «Erlıgı üşın» medalımen marapattalsa, 5 adam «Jauyngerlık erlıgı üşın» medalın keudesıne taqty.
Jalpy biylǧy Otan qorǧauşylar künı eldıŋ esınde erekşe saqtalatyn türı bar. Onyŋ bır sebebı, būl atauly kün biyl tūŋǧyş ret memlekettık mereke retınde atalyp, küntızbege qyzylmen belgılendı. Ekınşıden, däl osy mereke qazaqtyŋ tūŋǧyş äiel generalyn anyqtap berdı. Būǧan deiın äiel zatynan eşkım general ataǧyn ielenbegen edı. Endı, mıne, märtebelı ataqqa ie bolyp, tarihta qalǧan baqytty jan – Qazaqstan Respublikasy Bas prokuraturasynyŋ Qūqyqtyq statistika jäne arnaiy esepke alu jönındegı komitetınıŋ töraiymy Säule Aitpaeva bolyp otyr. 1960 jyly Torǧai oblysy, Jaqsy kentınde düniege kelgen Säule Mūhanbedianqyzy eŋbek jolyn Torǧai oblysy, Jaqsy audandyq prokuraturasy keŋsesınıŋ meŋgeruşısınen bastaǧan. Keiın Selinograd oblystyq, qalalyq jäne Aqmola oblystyq prokuraturasynda qyzmet atqarǧan ol 1997 jyldan bastap, Qazaqstan Respublikasy Bas prokuraturasy janyndaǧy Qūqyqtyq statistika jäne aqparat ortalyǧynyŋ bölım bastyǧy boldy. Qazırgı qyzmetıne ötken jyldyŋ säuır aiynan bastap kırısken. Būǧan deiın «Qazaqstan Respublikasy prokuraturasynyŋ qūrmettı qyzmetkerı», «Eren eŋbegı üşın» syndy köptegen medaldarmen marapattalǧan Säule Aitpaeva endı, mıne, Elbasynyŋ qolynan general şenın aldy.
Memleket basşysy şen alǧan azamattardyŋ būdan ärı de elge adal qyzmet etetınıne senım bıldırdı.
Qymbat NŪRǦALİ
