Örkeniettı elderde qyzmet körsetu sapasy aldyŋǧy orynda tūrady. Kez kelgen jeke tūlǧa sauda ortalyǧyna, dämhanaǧa nemese qonaq üige bas sūqsa, sol mekemenıŋ mamany aldynan qūşaq jaia şyǧyp, qūdaiy qonaǧy kelgendei jany qalmai kütıp, qyzmet körsetıp jatady. Tıptı, ol azamat älgı oryndarǧa jai kırıp şyqsa da qyzmetkerler ızgı ıltipat bıldırıp, şyǧaryp salady. Mıne, osydan-aq, adamnyŋ mädenietı, qala berdı qoǧamnyŋ mädenietı aiqyn körınedı.
Ärine, bız de örkendı eldıŋ önegelı jolyna bet būrdyq. Uaqyt talaby jaŋaşa ürdısterdı alyp keldı. Bügıngı taŋda elordada azyq-tülık dükenderı men şaǧyn marketter, ataǧynan at ürketın sauda ortalyqtarynan köp närse joq. Odan qaldy ashana deisıŋ be, dämhana deisıŋ be, säuletı men däuletı kelısken restorandar da jeterlık. Zäulım qonaq üilerdıŋ de sany molyraq. Äp-sätte tür-tüsıŋızdı ädemılep beretın sän salondary da köp. Qysqasy, jeke tūlǧalarǧa qyzmet körsetetın oryndardan aiaq alyp jüre almaisyz. Al olardyŋ qyzmet körsetu sapasy qandai?.. Mäsele osynda.
Bırde qyzymnyŋ şaşyn qidyru üşın sän salonyna bardyq. – On bes minut kıdıre tūryŋyzdar, – dedı administrator. Qoş, kütken uaqyt öttı, eş habar bolmady. Jarty saǧattan asty. Kışkentaiym typyrşi bastady. Sälden soŋ salon qyzmetkerı şyǧyp, – Menıŋ uaqytym joq, basqa klient keledı, – dep düŋk etkızdı. Qarapaiym qūrmet te, tıptı, sonşama kütken uaqytymyzdy alǧany üşın keşırım de sūraǧan joq. Amalsyzdan basqa salonǧa bardyq. Ondaǧy qyzmet körsetu sapasy joǧary deŋgeide eken. Şaştarazşy qyz sol demde ekı jasar baldyrǧannyŋ tılın tauyp, üiırıp aldy. Qaişydan qatty qorqatyn qyzym, qaita salonnan köŋıldenıp şyqty.
Taǧy bır mysal. Tüskı uaqytta dämhanaǧa auqattanuǧa bardym. Qabaǧy tüiulı, aspazşy qyz selsoq qarsy aldy. Mäzırden qalaǧan taǧamymdy aittym. Tyrs etıp läm degen joq. Älden keiın tasyr-tūsyr ydysqa asty salyp, aldyma tars etkızdı. Jüregım zırk ete qaldy. Köŋılı bolmai tūrǧan şyǧar degen oimen aqşamdy ūsyndym. Bır kezde aqşamnyŋ artyǧyn qolyma emes, özıme qarai laqtyryp jıberdı. Ol qalyqtap baryp, dymqyl edenge tüstı.
– Qaryndasym, būnyŋyz ne, qolyma berseŋız bolmai ma? – dedım. Közımen bır alara qarady da, öz jönımen kete berdı.
Rasy kerek, bas qaladaǧy ashana men şaǧyn kafelerdıŋ servistık qyzmetı köp jaǧdaida syn kötermeidı. Ärine, barlyǧyna bırdei topyraq şaşpaimyz. Olardyŋ arasynda atalǧan qyzmetke tolyq jauap beretın oryndar da jetkılıktı. Degenmen, adamdar köp şoǧyrlanǧan oryndardaǧy şaǧyn dämhanalardyŋ qyzmet körsetu sapasyna onşa köŋılımız tolmaidy.
Qyr astynan «EHRO 2017» halyqaralyq körmesı qol būlǧaidy. Oǧan älemnıŋ barlyq elı köz tıgıp otyrǧany jasyryn emes. Qanşama qonaq alystan at arytyp kelmek. Al, bız olarǧa sapaly qyzmet körsetuge daiynbyz ba?!
Azamat ESENJOL
