Astanada Qazaqstannyŋ Eŋbek Erı, Memlekettık syilyqtyŋ laureaty, asa körnektı kompazitor Erkeǧali Rahmadiev atyndaǧy I halyqaralyq baiqaudyŋ şymyldyǧy türıldı.
Būl şarany QR Mädeniet jäne sport ministrlıgı men Qazaq ūlttyq öner universitetı ūiymdastyryp otyr. Baiqauǧa Resei, Qyrǧyz jäne basqa da elderden ümıtterın ükılep kelgen 100-den asa daryndy jastar qatysyp, vokaldyq öner jäne hordy dirijerleu degen ekı atalym boiynşa tört kün baq synaidy.
Ūlttyq önerde özgeşe ız qaldyrǧan Erkeǧali aǧamyz turaly tolǧanyp ta, tolǧap ta jazuǧa bolady. Qazaq muzykasyn tereŋ zerttep, zerdelep ketken Ahmet Jūbanov pen körnektı kompazitor Mūqan Tölebaevtan keiın saz önerınde alǧaş auyzǧa ılıgetın de – osy kısı. Onyŋ kompozitorlyq qarymy, ärı-berıden soŋ qairatkerlık qyry turaly da parasatty söz köp aitylady. Otyz jylǧa juyq Qazaqstan kompozitorlar Odaǧynyŋ töraǧasy bola jürıp, talai talantty jastyŋ tūsauyn kestı. Almatydaǧy Qūrmanǧazy atyndaǧy Memlekettık konservatoriiaǧa jetekşılık ettı. Elımız Täuelsızdık alǧan eleŋ-alaŋ şaqta Mädeniet ministrı boldy. Halyq qalaulysy bolyp, eldıŋ sözın söiledı.
Orystyŋ Rahmaninovı sekıldı Rahmadiev te – ūlttyq önerdıŋ örısın örıstetken tūlǧa. Ol otandyq simfoniialyq, operalyq, vokaldy-aspaptyq, kameralyq şyǧarmalardyŋ janrlyq salalaryn baiytty. Simfoniialyq şyǧarmalarda qazaq küilerınıŋ ışık iırımderın aşa otyryp, tögıltıp jetkızdı. Mysaly, osy baǧytta jaŋaşa örılgen «Dairabai küiı» älemdegı «men» degen tuyndylarmen iyqtasady. Onyŋ «Qamar sūlu», «Alpamys», «Tyŋ tynysy» operalaryn, «Amangeldı», «Tolǧau», «Meiram küiı», «Qūdaşa duman» atty simfoniialyq poemalary men «Sälem saǧan, Aiaastan», «Merekelık kantata» jäne «Konstitusiia turaly poema» kantatalaryn klassikalyq muzykanyŋ bır biıgı desek bolady.
Osyndai alyp tūlǧa atyndaǧy halyqaralyq baiqaudyŋ elordadaǧy Qazaq ūlttyq öner universitetınde ötuı tegın emes. Aǧamyz ömırınıŋ soŋǧy jyldarynda osy öner ordasynyŋ damuyna eren üles qosyp, jelkıldep ösıp kele jatqan talantty jastarǧa ūlaǧatty ūstaz bola bıldı. İgılıktı şaranyŋ aşyluynda atalǧan universitettıŋ rektory Aiman Mūsaqojaeva ardaqty azamattyŋ ömırı men önerıne airyqşa toqtalyp, mazmūndy oi örbıttı. Kompozitordyŋ ömırlık jary bolǧan Klara apai Rahmadieva da öner tarlany jaiyndaǧy ädemı estelıkterımen bölıstı.
Sondyqtan, bız baiqauǧa qatysuşylarǧa aq jol tılei otyryp, onyŋ qorytyndysy jaiynda gazetımızdıŋ aldaǧy sandarynda keŋırek jazatynymyzdy aitpaqpyz.
Azamat ESENJOL
