Qytai qazaqtary soŋǧy jyldary Ginnestıŋ rekordtar kıtabyna bırneşe märte endı. Ūlttyq tabysty ūlyqtauşy bauyrlarymyz salt-dästürımızdı hal-qadırınşe nasihattap, älem jūrtşylyǧy aldynda paş etıp jür.
Ūlttyŋ «Qarajorǧasy»
Qazaq halqynyŋ erteden kele jatqan dästürlı bilerınıŋ bırı «Qara jorǧa» ekenı dausyz. Osydan tört jyl būryn qandastarymyzdyŋ ūltjandylyǧynyŋ arqasynda 10 myŋnan astam adam bilep şyqqan «Qara jorǧa» biı Ginnestıŋ rekordtar kıtabyna endı. Altai aimaǧynyŋ Ör Altai dep atalatyn qazaqtar şoǧyrlanǧan Şıŋgıl audanynda ötken toptyq bige 13288 adam qatysqan. Al, «Qara jorǧa» biıne daiyndyq üşın jattyǧuǧa üş-tört ai uaqyt ketken eken.
Qazaqtyŋ qazysy
Juyrda Şyŋjaŋ Ūiǧyr avtonomiialy audanynda daiyndalǧan ūzyndyǧy bır şaqyrymnan asatyn qazy älemdegı eŋ ūzyn qazy atanyp, Ginnestıŋ rekordtar kıtabyna endı. Qazyny Emıl uezındegı «Vantun» mal fermasynyŋ jūmysşylary ūlttyq taǧam aptalyǧy aiasynda äzırlegen. Qazaqtyŋ qazysyna 5 tonna jylqy etı, iaǧni, 44 jylqy jūmsalǧan. Alyp qazyny daiyndauǧa toǧyz kün uaqyt ketken. Köpşılıktıŋ nazaryna ūsynu üşın qazy aumaǧy kiız üidei bolatyn ülken tabaqqa qatar-qatar oralyp, tau siiaqty ornalastyrylǧan. Jergılıktı qazaqtar pısırgen qazynyŋ ūzyndyǧy –1111 metr. Salmaǧy – 4572 kelı.
Qyzai kestesı
Byltyr jaz aiynda Ile qazaq oblysynyŋ Nylqy audanynda 10 myŋ adam qyzai kestesın tıgıp, Ginnes rekordyn jaŋartty. Qyzai keste – qolönerdei qazaq halqynyŋ san ǧasyrlyq saf önerınıŋ jauhary. Aty ruǧa, ataǧy ūranǧa ainalǧan Qyzai ana kestesı Nylqy qalaşyǧynyŋ Taŋbaly köşesınde 10 myŋ 494 şeberdıŋ qolymen bır mezgılde daiyndaldy.
Būdan bölek Toly audanynda 10 myŋ küişi bır mezgılde küi tartyp, qazaq dombyrasynyŋ qūdıretın asqaqtatty. Ginnestıŋ kitabyna engen küidiŋ aty – «Keŋes». Avtory – Beisenbi Dönenbaiūly. Sonymen qatar, 2012 jyly Qytaida tūratyn qazaq jıgıtı Bolatbek Kärımhanūly jasaǧan kışkentai dombyra «älemdegı eŋ kışkentai aspap» retınde rekordtar kıtabyna endı. Dombyranyŋ ūzyndyǧy – 45 millimetr, enı – 14 millimetr.
Gülmira AIMAǦANBET,
g.aimaganbet@astana-akshamy.kz
