Sarapşylar qiyn jaǧdaidaǧy elordalyq otbasylardy qarjylyq sauattylyqqa üiretedı
«AMANAT» partiiasy Memleket basşysynyŋ tapsyrmasyn ıske asyru üşın byltyrdan bastap azamattarǧa qarjylyq bılım beru maqsatynda «Qaryzsyz qoǧam» jobasyn ıske asyra bastady. Atalǧan joba aiasynda Astana qalasy boiynşa biyl 9300 azamatty qarjylyq sauattylyqqa oqytu josparlanyp otyr, dep habarlaidy astana-akshamy.kz.
Däl qazırgı taŋda onyŋ 1500-ge juyǧy seminarlarda därıs alyp şyqty.
Jalpy, jobanyŋ maqsaty – memlekettık oryndarmen bırlese otyryp, halyqtyŋ äl-auqatyn köteruge, azamattardyŋ ömır süru sapasyn arttyruǧa yqpal etu.
«Qaryzsyz qoǧam» jobasyn jüzege asyru üşın alty baǧyt jasaqtalǧan. «Amanat» partiiasy Astana qalasy filialy atqaruşy hatşysynyŋ mındetın atqaruşy Mūhammed Bolysbek jobanyŋ negızgı baǧyttaryna toqtaldy.
«Bırınşı baǧyt boiynşa «Qaryzsyz qoǧam» bılım beru jobasynyŋ auqymyn keŋeitu üşın yntymaqtastyq memorandumy jasaldy. Ekınşı baǧyt jobalar komandalaryn qūruǧa arnaldy. Üşınşı baǧyt halyqtyŋ qarjylyq sauattylyǧyn arttyruǧa baǧyttalǧan. Al törtınşı baǧyttyŋ maqsaty azamattardyŋ banktık qaryzdary men şaǧyn nesielerı boiynşa problemalyq bereşekterın retteu bolyp sanalady. Sondai-aq besınşı baǧyt jūmyspen qamtu jäne biznes jürgızu mäselerı boiynşa keŋester beruge jäne altynşy baǧyt zaŋnamany jetıldıruge arnalǧan», – dedı spiker.
Joba ūiymdastyruşylarynyŋ mälımetınşe, qarjylyq sauattylyqty arttyruǧa arnalǧan kurstar bes künge sozylady ärı tegın oqytylady. Mamandardan qūralǧan top tek qalalarda ǧana emes, segız aimaqqa şyǧyp, sonyŋ ışınde auyldyq jerlerde oqu seminarlaryn ötkızdı. Onda azamattar kırıster men şyǧystardy josparlau, nesielerdı öteu men täuekelderdı basqaru, sondai-aq jinaq aqşalaryn qarjy qūraldaryna sauatty salu boiynşa bılım aluǧa mümkındık alady. Mūnda tek keŋes alyp qana qoimai, barlyq niet bıldıruşıler öz ısın aşu üşın öz biznes-josparyn tüzuge de üirenedı.
«Joba şeŋberınde qatysuşylar bılıktı zaŋgerlerdıŋ aqysyz kömegıne de jügıne alady. Mäselen, Memleket basşysynyŋ tapsyrmasyna säikes, qiyn jaǧdailarǧa tap bolǧan otbasylardyŋ nesiesı keşırılıp, jeke tūlǧalardyŋ bankrottyǧy turaly zaŋ qabyldanǧany belgılı. Al qaryzǧa belşesınen batqan jan osy sanatqa kıre me, joq pa, mamandardyŋ kömegımen anyqtalyp, partiia, äkımşılık, bank bırlesken top azamatqa tyǧyryqtan şyǧudyŋ jolyn nūsqauǧa kömek körsetedı. Mysaly, bır adamnyŋ basynda 8 nesiesı boluy mümkın, mūndaida mamandar oǧan, bırınşı kezekte qomaqty qarajatty talap etetın nesiesın aldymen öteuge keŋes beredı. Is-täjıribe nätijesınde osyndai qiyndyqtan şyqqan adamdar bar», – dedı Mūhammed Bolysbek.
Aita keteiık, Astana qalasynda qarjylyq sauattylyqqa üiretetın sarapşylar qyzmet etedı. Olar är aptada jaŋa topty oqytyp şyǧaruda.
