Memleket basşysynyŋ bastamasymen ötıp jatqan «Taza Qazaqstan, elorda – tazalyq pen tärtıptıŋ ülgısı» atty ekologiialyq aksiiaǧa bolaşaq medisina mamandary da atsalysty. Keşe Astana medisina universitetınıŋ 7 myŋnan astam studentı qalada senbılıkke şyqty.
Atalǧan oqu ornynyŋ prorektory Dias Saidanǧazinnıŋ aituynşa, būl tazalyq aksiiasy el erteŋı jastardyŋ patriottyq sezımın arttyryp, olardy öz elın süietın, ainalasyna jany aşityn qamqor etıp tärbieleude maŋyzy zor. Astana qalasy äkımdıgınıŋ qoldauymen ūiymdastyrylǧan ıs-şara barysynda universitet basşylyǧy men oqytuşylary jastardy atalǧan oqu ornynyŋ qalada bırneşe jerde ornalasqan ǧimarattaryn, sol maŋdaǧy köşelerdı tazalauǧa jūmyldyrdy.
-Prezidentımızdıŋ bastamasyna qoldau bıldıru maqsatynda ötken aksiiada bızdıŋ studentter tek oqu oryndary aumaǧyn ǧana emes, Esenberlin köşesınen bastap Kenesary köşesıne deiın Beibıtşılık köşesın ekı qaptalynan qamti otyryp, tazalau jūmystaryn jürgızdı. Qystan qalǧan şırıgen japyraqtar men qoqystardy jinap, qaptarǧa saldy jäne universitet janynda 30 tüp aǧaş ektı, – dedı aksiia barysynda oqu ornynyŋ prorektory.
Ekologiialyq aksiiaǧa qatysqan şetelden kelgen studentterdıŋ bırı Saif Muniib Ali de özınıŋ osyndai maŋyzdy ıs-şaranyŋ ortasynan tabylǧanyna quanyşty ekenın jetkızdı.
-Ekologiia degenımız jäi bır sänge ainalǧan söz emes, būl bızdıŋ densaulyǧymyz ben bolaşaq ūrpaqtardyŋ igılıgı üşın körsetıletın qamqorlyq. Qorşaǧan ortanyŋ tazalyǧy barşamyzdyŋ densaulyǧymyzǧa tıkelei äser etedı. Mūndai maŋyzdy aksiialardan bızdıŋ universitet eşqaşan tys qalǧan emes. Men ärbır qazaqstandyqtardy osy ıske belsene qatysuǧa şaqyramyn. «Taza Qazaqstandy» bärımız bırge jasai alamyz, – deidı ol.
Al universitettıŋ jalpy medisina fakultetınıŋ 4-kurs studentı, ärı oqu ornynyŋ mädeni departament basşysy Ersūltan Qydyrbai mūndaǧy studentter volonterlık qozǧalystardyŋ bärıne belsene qatysatynyn aitady.
-Būl aksiianyŋ tärbielık maŋyzy zor. «Taza ölke», «Kielı meken», «Jasyl aimaq» syndy bırneşe bölıkten tūratyn aksiia elımızdıŋ tabiǧatyn aialap, ony qorǧap, saqtauǧa şaqyrady. Atalǧan ıs-şaralar köpşılık jinalyp, köşenı tazalaityn bır mezettık nauqanǧa ainalmauy kerek. Sebebı qorşaǧan ortany barlyq uaqytta qorǧau – ortaq paryzymyz, – deidı aksiiaǧa qatysuşy student.
Bügınde būl oqu ornynda barlyǧy 11 myŋǧa juyq student bılım alady. Sonyŋ basym bölıgı qatysqan aksiia barysynda tazalau jūmystaryna qajet jabdyqtardyŋ bärın qala äkımdıgı qamtamasyz ettı.
