Elordada «Taza Qazaqstan. Astana – tazalyq pen tärtıptıŋ ülgısı» auqymdy ekologiialyq ıs-şarasy aiasynda Astanada vandalizmge qarsy baǧyttalǧan «Toqta, vandal!» aksiiasy öttı, dep habarlaidy astana-akshamy.kz
Astanada erıktıler, belsendıler, tanymal sportşylar, ÜEŪ ökılderı, qala tūrǧyndary, audan äkımdıkterınıŋ jäne qalalyq Polisiia departamentınıŋ Esırtkı qylmysyna qarsy küres basqarmasy qyzmetkerlerı, mäslihat deputattary qoldaǧan «Toqta, vandal» aksiiasy jürıp jatyr. Aksiia aiasynda qalada kündızgı jäne tüngı reidter ötkızıledı, tūrǧyndar arasynda qoǧamdyq tärtıptı saqtau jäne qala mülkıne ūqypty qarau qajettılıgı turaly tüsındıru jūmystary jürgızıledı. Bötennıŋ mülkın qasaqana büldıru äkımşılık jauapkerşılıkke äkep soǧady. Vandalizm jasaǧandar jazasyz qalmaidy.
«Toqta, vandal!» atty aksiia 2021 jyldan bastau aldy. Bız qaladaǧy ǧimarattardyŋ qabyrǧalaryna elordamyzdyŋ sänın ketırıp, bei-bereket jazylǧan suretter men jazulardy öşıremız. Onda esırtkı önımderıne sılteme, saittar körsetılgen boluy mümkın. Mıne, vandalizmmen kürese otyryp, naşaqorlyqtyŋ da aldyn aluǧa kömektesemız. Mūndai närseler köbıne ǧimarattardyŋ qabyrǧalaryna, aialdamalarǧa, oryndyqtarǧa jazylady. Vandalizm būl qoǧamdyq mülıkke ziian tigızıp qana qoimaidy, sonymen qatar tūrǧyndardyŋ qauıpsızdıgı men jailylyǧyna qauıp töndıredı. Bız būǧan nemqūraily qaramauymyz kerek», – dedı volonter İlia Jaqsylyq.
Jyl basynan berı sot bötennıŋ mülkın qasaqana syndyrǧany, jalpy paidalanu oryndaryn lastaǧany, ǧimarattar men tūrǧyn üi-jailardy büldırgenı üşın 100-ge juyq adam jazalandy. Olardyŋ bärı jauapqa tartyldy.
Aksiianyŋ maqsaty – vandalizmnıŋ kez kelgen jaǧdaiyn boldyrmau jäne elordada tazalyq pen tärtıptı saqtau. Vandalizmnıŋ aldyn alu jūmystary qalalyq prokuratura men polisiia departamentınıŋ üilestıruımen jürgızıledı.
Aita keteiık, astanalyq jastar veipke qarsy aksiiany da qolǧa aldy. Osylaişa, olar jastardyŋ jaman ädetten arylyp, kerısınşe sportqa ūmtyluyna üles qosyp jatyr.
