Astanada alty kün boiy dürıldegen «Şabyt» şyǧarmaşyl jastardyŋ XIX halyqaralyq festivalınıŋ qorytyndysy şyǧaryldy. Älemdık deŋgeidegı şaraǧa qatysuǧa Qazaqstan, Äzerbaijan, Qytai, Qyrǧyzstan, Resei, Özbekstan jäne Ukraina elderınen kelgen 644 ümıtkerdıŋ arasynda dara şyqqan jastardy marapattau räsımı Beibıtşılık jäne kelısım saraiynda öttı.
Bas jülde – Qazaqstan Prezidentınıŋ kubogy «Köleŋkesız adam» tolǧauy men «Qūlan auǧan» öleŋın «Üzdık ädebi şyǧarma» atalymyna ūsynyp, top jarǧan astanalyq aqyn Erbol Alşynbaiǧa būiyrdy. Kubokty aqynǧa Astana qalasy äkımınıŋ orynbasary Ermek Amanşaev tapsyrdy.
– «Şabyt» festivalı märesıne jettı. Būl festivaldıŋ eŋ joǧary, eŋ baǧaly syilyǧy – Elbasymyzdyŋ kubogy. Jyl saiyn osy jülde iegerın anyqtau barysynda bız köp tolǧanyp, qazylar alqasynyŋ müşelerımen keŋ sūhbat qūramyz. Sonda är atalymnan kem degende bır ümıtker ūsynylady. Qorytyndysynda özınıŋ bar şyǧarmaşylyq qabıletın jarqyrata aşa bılgen jasqa beremız. Astana äkımı Äset İsekeşevtıŋ atynan jastarǧa laiyq baǧasyn bergen qazylar alqasynyŋ barlyq müşelerıne ülken alǧysymdy bıldıremın, – dedı äkımnıŋ orynbasary.
Būl joly daryndy jastar alty atalym boiynşa saiysqa tüstı. «Klassikalyq muzyka» atalymy ışınara üş tarmaqqa bölındı. Sonyŋ alǧaşqysy – aǧaştan jasalǧan ürmelı aspaptarda şyǧarmalardy oryndauda Tolǧanai Däulet üzdık atandy. Mys ürmelı aspaptar men soqpaly aspap boiynşa Iliias Äbdıraşev daralandy. Klassikalyq aspapty ansambl tarmaǧynda Aqdidar Toqtaǧan men Dana Bukunevanyŋ duetı ozyp şyqty.
«Beineleu önerı» atalymynda Asqar Nūrbolat bas jülde aldy. Sondai-aq, grafika jäne körkemsuret tarmaqşalarynda bırqatar suretşı diplomant atandy.
«Halyq muzykasy» atalymyndaǧy bas jülde muzykalyq aspaptarǧa säikes üş qatysuşyǧa tabystaldy. Prima qobyz ben qobyzdy Aiattola Tūrǧanov bärınen şeber meŋgerdı dep şeşıldı. Daryn Qūdaibergenov dombyranyŋ qūlaǧynda oinaityndyǧyn tanytty. Al prima dombyra, şerter jäne bas-şerter tarmaqşasynda Bauyrjan Mūqajanov qarsylastarynan qara üzdırdı.
«Estradalyq vokal» atalymynda Qytaidan kelgen qandasymyz Qaisar Dalaiūly gran-pri iegerı atandy. Al «Horeografiia» atalymynda Almaty oblysynyŋ atynan festivalge qatysqan «Altynai» bi ansamblı top jardy.
– Azat Astananyŋ aspanynyŋ astynda on toǧyzynşy ret «Şabyt» festivalınıŋ şalqar toiy öttı. Būl Elbasy Nūrsūltan Nazarbaevtyŋ arqasynda ırgetasyn berık qalaǧan Qazaq elınıŋ jas tūlparlary men jas sūŋqarlarynyŋ toiy boldy. Jüzden jüirık, myŋnan tūlpar şyqqan önerımızdıŋ bolaşaǧy, halqymyzdyŋ keleşegı – jastar dübırın tek Qazaq elı ǧana emes, bükıl körşı elder sezdı. Sondyqtan «Şabyttyŋ» toiy – halyqtyŋ toiy degım keledı. Būl toidy jyl saiyn ötkızıp kele jatqan Astana äkımdıgıne, ony basqaryp otyrǧan azamattarǧa jastardyŋ atynan, qazylar alqasynyŋ atynan köpten-köp raqmet aitqym keledı. Öitkenı biylǧy toidyŋ basqa jyldardaǧy toilardan jönı bölek. Biyl festival Täuelsızdıgımızdıŋ 25 jyldyǧy aiasynda ūiymdastyryldy. Sondyqtan biylǧy «Şabyttyŋ» şaryqtauy da, biıkteuı de erekşe boldy. Mäŋgılık el boluymyzdyŋ tıregı bügıngı jastardyŋ qolynda. Halyqtyŋ äl-quaty jyl saiyn artyp keledı. Alaida ruhaniiaty, önerı jūtaŋ el alǧa baspaidy. Al «Şabyt» tört qūbylasy tügel önerlı jastarymyzdyŋ qanatyn aspanǧa samǧatyp, şaryqtatty. Elbasy Ūlytaudyŋ törınen söilegen sözınde bızdıŋ arǧy-bergı önerımızdıŋ tarihy turaly tolǧana otyryp, jastarǧa senım artty. Sol jastarǧa degen senım aqtalyp otyrǧandai, – dedı būl joly qazylar alqasyna töraǧalyq etken belgılı aqyn, Memlekettık syilyqtyŋ iegerı Nesıpbek Aitūly.
Festivaldıŋ jabyluyna bailanysty ötken gala-konsertte onyŋ jeŋımpazdarymen qatar, Beibıt Qūşqaliev, Ademi syndy belgılı estrada änşılerı men «Aiumi» toby jinalǧandarǧa köterıŋkı köŋıl küi syilady.
Amanǧali QALJANOV
