Elordada taksi qyzmetıne talap küşeiıp, qala äkımdıgı qauıpsız taksi qyzmetıne erekşe den qoia bastady. Qala köşelerıne ekonom, standart jäne biznes-klastaǧy myŋnan asa kölık şyqpaq. Bıryŋǧai taksidıŋ salonynda tölem kartasyn qabyldaityn terminal, taksometr jäne wi-fi ornatylady.
Bas qalada taksi qyzmetıne sūranys köp. Dıttegen jerıŋızge jedel jetkıŋız kelse, kez kelgen taksige mınıp kete beresız. Baǧasy da qoljetımdı. Olardyŋ qatarynda zaŋdy taksi parkterınıŋ jürgızuşılerı de, «jabaiy» taksi de bar.
Bır jaqyn dosym – taksi jürgızuşısı. Sol qyzmetımen Astanada adam tasyp, otbasyn asyraidy. Tapqan tabysynyŋ teŋ jarymyn jaldap otyrǧan baspanasy men jaŋadan alǧan kölıgınıŋ kreditıne töleidı. Äiteuır, osy jūmystan ketkısı joq. «Üirenıp qalǧam, özıme ūnaidy» dep bır jymiyp qoiady. Rasymen de bügıngı taŋda taksi köptegen azamattardyŋ negızgı tabys tabu közıne ainaldy.
Taksi qyzmetınıŋ körıgı tüngı uaqytta qyzady. Taŋ atqanşa köz ılmei jūmys ısteitınder köp. Äsırese, sondai kezde jabaiy taksisterdıŋ aiy oŋynan tuady. Olar adamdar köp şoǧyrlanǧan oryndarda jüredı. Mäselen, vokzal, äuejai, ülken sauda oryndary aldynda zaŋsyz avtotūraq jasap alǧandar barşylyq. «Jabaiy» taksisterge mınu bır jaǧynan qauıptı. Joldan kezıkken kez kelgen maşinaǧa mınıp, türlı jaǧdaiǧa ūşyrap jatqan jandar elımızde köp. Sondyqtan, jolauşylardyŋ qauıpsızdıgı alaŋdatady.
Biylǧy jyldyŋ säuır aiynda ötken Astana qalasynyŋ äleumettık-ekonomikalyq damuy men EKSPO körmesı mäselelerıne arnalǧan keŋeste Memleket basşysy elordadaǧy taksi qyzmetıne toqtala kelıp: «Älı künge deiın zamanaui taksi qyzmetı joq. «Ekotaksidı» almaǧanda, barlyq taksiler ala-qūla, taksometrsız, syrtqy türlerınıŋ standarty, bıryŋǧai kiım formasy joq» degen edı.
Qazırgı taŋda elorda halqynyŋ sany millionǧa jaqyndady. Elımızdegı ırı megopolis dese de bolady. Sol talapqa säikes bas qaladaǧy taksi qyzmetı de joǧarǧy deŋgeide boluy qajet. Osyny eskergen elorda äkımdıgı zaŋdy jūmys ıstep jürgen taksilerge bıryŋǧai talaptar engızbek. Jürgızuşıler jüru erejelerın qataŋ bılu qajet. Jolauşylarmen mädeniettı
tıl tabysu kerek. Uaqyt talabyna sai aǧylşyn tılın de meŋgergen jön. Öitkenı, aldymyzda barlyq älem köz tıgıp otyrǧan «EKSPO–2017» halyqaralyq körmesı kele jatyr.
«Astana LRT» JŞS Jolauşy kölıgı basqarmasynyŋ jetekşısı Beibıt Esjanovtyŋ aituynşa, elordadaǧy taksi jelısın jetıldıruge arnalǧan joba «City taxi» dep atalady. «Taksidıŋ syrtqy türı bıryŋǧai formatta bekıtıluı kerek. Sonymen qatar osy qyzmet türı lisenziialanuy qajet. Būl lisenziiany alu üşın jürgızuşı aldymen tiıstı mamandandyrylǧan oqu ornynda bılıktılıgın jetıldıruge mındettı bolady» deidı Beibıt Esjanov.
Atalǧan joba aiasynda taksi infraqūrylymyn damytu közdelgen. Bügınde qala boiynşa taksilerge arnalǧan 47 oryn jasaqtalǧan, aldaǧy uaqytta olardy 300-ge deiın arttyru közdelgen.
Asyly, taksi qyzmetı naryqtyq qatynastar zaŋyna baǧynǧan. Bügınde Astanada jeŋıl kölıktermen jolauşylar jäne şaǧyn jük tasymaldaumen ainalysatyn 14 taksi parkı tırkelgen. Osydan tört jyl būryn paidalanuǧa berılgen «Astana Eko taksi» qalalyq taksoparkı qyzmetı jönınde jūrtşylyq jyly pıkırde. Olardyŋ qyzmet körsetu deŋgeiı aitarlyqtai. Kölıkterdıŋ barlyǧy uaqyt talabyna sai jaraqtalǧan. Ekologiialyq otynmen jüredı.
Jolauşylardyŋ qauıpsızdıgı de qorǧalǧan. Biylǧy jaŋa jyldan bastap Astana äuejaiynda jolauşylardy resmi tasymaldauşy retınde «Ekotaksi» öz qyzmetın jüzege asyra bastady. Onyŋ qyzmetkerlerı jolauşylardy qarsy alyp, keŋes beredı.
Bız osy jerde elordadaǧy «Keruen» sauda oiyn-sauyq ortalyǧynyŋ aldynda «Astana Company KZ» JŞS taksi jürgızuşısı Säken Bolat degen azamatpen kezdesıp, pıkırlesken edık.
– Osy mekemede ekı jyldan berı jūmys ısteimın. Bız adamdarǧa täulık boiy qyzmet körsetemız. Ärine, jürgızuşıler auysymmen auysyp otyrady. Astanada taksi qyzmetınde bäsekelestık küştı. Äsırese, jabaiy taksiler aldymyzdy oraidy. Sonda da öz klientterımızdıŋ köŋılın qaldyrmaimyz. Bızdıŋ firmada 30-ǧa juyq maşina bar. Olardyŋ barlyǧy zaŋdy qyzmet körsetedı. Jolauşyǧa şek beremız. Künıne kompaniiaǧa maşinany jalǧa alǧan üşın bes jarym myŋ töleimız. Onyŋ syrtynda janarmai bar, dispetcher qyzmetı de aqyly. Qalǧan tabysymyzben otbasymyzdy asyraimyz. Arnaiy qyzmet kiım kiemız. «EKSPO-2017» halyqaralyq körmesıne mūqiiat daiyndalyp jatyrmyz. Kölıkterımız de jaŋarady, – deidı ol.
Qoryta kelgende, elordadaǧy taksi qyzmetıne talap küşeimek. Onyŋ barlyǧy adamdardyŋ qauıpsızdıgı men jailylyǧy üşın atqarylyp jatqan ızgılıktı ıs deuge bolady.
Azamat ESENJOL
