Temekı tūqylyn körıngen jerge tastaǧan adamdar da äkımşılık jazaǧa tartylady. Künı keşe tartqan şylymyn qoqys jäşıgıne emes, tura balalar oinaityn aulaǧa laqtyrǧan azamat polisiianyŋ qūryǧyna ılındı.
«Uchastok» jedel aldyn alu şarasyn ötkızu kezınde uchaskelık inspektor Bauyrjan Qasenov Seifullin köşesındegı, 29-üidıŋ maŋaiynda bır azamattyŋ temekı tūqylyn tastaǧanyn baiqap qalǧan. İnspektor bırden 18 jastaǧy azamatqa äkımşılık hattama toltyryp, arnaiy şeşım şyǧaruǧa qūjatty Astana qalasy mamandandyrylǧan audanaralyq äkımşılık sotyna jıbergen. Sot «Ūsaq būzaqylyq» ısı boiynşa älgı azamatqa 10 ailyq eseptık körsetkış kölemınde aiyppūl saldy. Būl – 21210 teŋge degen söz.
Astana qalasy Işkı ıster departamentı Jergılıktı polisiia qyzmetınıŋ inspektory Läzzät Bisembaevanyŋ mälımdeuınşe, bügınge deiın uchaskelık inspektorlar 3493 ūsaq būzaqylyqty anyqtap, materialdardy sotqa jıbergen. Onyŋ ışınde 378 azamat äkımşılık qamauǧa alynsa, 3115-ıne aiyppūl salynǧan.
Polisiia qyzmetkerlerı kez kelgen būzaqylyq eleusız qalmaitynyn, äkımşılık jazaǧa ılıkkender ne aiyppūl töleitının, ne 10 künge deiın äkımşılık qamauǧa alynatynyn eskertedı.
Qymbat NŪRǦALİ
