Üzdıkter ozǧan üş kün

Ötken aptanyŋ jūmasynda Astana qalasyndaǧy «Saryarqa» velo­tregınde erler men äiel­der arasyndaǧy auyr atletikadan Aziia chempionatynyŋ aşylu saltanaty bolyp ötkendıgı özderıŋızge belgılı.

Bairaqty bäsekenıŋ şymyldyǧyn türgen şaranyŋ äuelei salǧan änder men şattyqqa toly biler şy­raiyn aşyp, şeteldık qonaq­tar ūlttyq än-küiımızge qūlaq qūry­şyn qandyrǧan bolatyn. Eŋ bas­tysy, Memlekettık änūranymyz şyrqalyp, qonaqtar tıkesınen-tık tūryp, qūrmet körsetken. Sälden soŋ jiylǧan jūrt elımızde auyr atletikanyŋ damuy 1930 jyldardan bastau alatyny turaly, Qazaqstan Keŋes odaǧynyŋ qūramynda bolǧan kezdegı äigılı sportşylar jäne täuelsız memlekettıŋ tuyn kökke kötergen tolaǧailarymyz jaily beinekörsetılımdı tamaşalady.

Jinalǧandar aldynda söz söi­legen QR Sport jäne dene şy­nyq­tyru ısterı agenttıgınıŋ töraǧasy Erlan Qojaǧapanov: «Älemde auyr atletikanyŋ qarqyndy damyp kele jatqany barşaŋyzǧa mälım. Bızdıŋ elımızde de sporttyŋ osy türı jaqsy damu üstınde dep maqtanyşpen aita alamyz. Oǧan Londonda ötken Olimpiadadaǧy qyzdarymyz ben İlia İlinnıŋ jetıstıkterı dälel. Bolaşaqta da jetıstıkterımız jo­ǧary bolady dep ümıttenemız jäne senemız!» dedı.
Odan ärı sözın jalǧaǧan agenttık töraǧasy: «Būl chempionat bızdıŋ elımızdıŋ jäne özge memleketterdıŋ ökılderı arasynan köptegen jaŋa jūldyzdardy şyǧaratyny dau­syz.

Men osy chempionatty ötkı­zuge qoldau jasaǧany üşın Aziia auyr atletika federasiiasyna airyqşa rizaşylyǧymdy bıl­dıre­mın. Būl dodaǧa qatysuǧa kelgen sport­şy­larǧa da alǧys aitamyn» dedı.

Aziia bırınşılıgındegı alǧaşqy syn

Qūrlyqtyq bäsekenıŋ alǧaşqy jeŋımpazdary 48 kelıge deiıngı äielder arasynda anyqtaldy.

Eŋ jeŋıl salmaqta elımızdıŋ aty­nan Galina Mamotova şyqty. Al­ǧaşqy jattyǧuda sportşy 77 kelılık zıltemırdı köterdı, al jūlqa köterude 90 kelını baǧyndyra aldy. Jalpy qorytyndyda onyŋ baǧyndyrǧan salmaǧy – 167 kelı. Ökınışke qarai, būl körsetkış ony jüldelı orynnan körsete almady.
Būl synda Soltüstık Koreianyŋ ökılı Rian Chun Hva altynnan alqa taǧynsa, indoneziialyq Sirl Şaguani ekınşı oryndy ielendı. Qola jülde vetnamdyq Huan Do Huaiǧa būiyrdy.

Jan jūbatar jalǧyz kümıs

21 elden 150 auyr atletşı baq synap jatqan Aziia chempionatynyŋ alǧaşqy künı öner körsetken qazaq auyr atletşılerınıŋ nätijelerı köŋıl könşıtpedı. 62 kelıde synǧa tüsken Farhat Harki kümıske qol jetkızbegende, alǧaşqy kün qorytyndysy boiynşa qan­jyǧa­myz bos qalǧandai eken. Aby­roi bolǧanda Farhad jūlqa köterude 138 kelını eŋserıp, serpe köterude 165 kelını baǧyndyrdy. Būl sal­maqta bırınşı oryn qytailyq sportşy Kim Uu Gukke būiyrdy.
Altyn almasa da jüldege ılınedı degen Arli Chontei ümıttı aqtamady. Ol serpe köterude 115 kelını al­ǧanymen, jūlqa köterude 135 kelını baǧyndyra almady.
Qyzdar arasynda baq synaǧan taǧy bır sportşymyz Margarita Eliseeva 53 kelı salmaqta törtınşı oryn aldy. Ol jalpy esepte 183 kelılık zıltemırdı köterdı.

Ekınşı künı jülde būiyrmady

Aziia chempionatynyŋ ekınşı künı Pavlov ta, Balhaev ta jüldege ılınbedı. Äielder arasynda synǧa tüsken Karina Goricheva da jaqsy nätijege qol jetkızbedı.
Aziia chempionatynda 77 kelı sal­maqta synǧa tüsken Kirill Pav­­lov törtınşı oryn aldy. Qos saiystyŋ qorytyndysy boiynşa ol 346 kelını köterdı. Būl salmaqta altyndy irandyq auyr atletşı Rasul Takhiia­ni alsa (366 kg), kümıstı qytailyq sportşy Jang Gouşin (356kg) enşıledı. Qola jüldenı Soltüstık Koreia elınıŋ azamaty Eim Kvang Song ielendı.

63 kelıge deiıngı äielder arasyn­daǧy bäsekede Karina Goricheva Aziia chempionatynda soŋǧy orynǧa ornyqty. Bırınşı oryndy Lin Zu Chi, ekınşı oryndy soltüstık koreialyq Cho Pok Huang alsa, üzdık üştıktı qytailyq sportşy Vu Liiang tüiındedı.

Al, erler arasyndaǧy 63 kelı salmaqta Älıbek Balhaev jetınşı orynnan körındı. Būl salmaqta on bır auyr atletşı synǧa tüsıp, irandyq auyr atletşı Jaber Beruzi altyn alqalady. Al kümıstı indoneziialyq Arian Ketutu qanjyǧalap, qolany Pank Chier Hungu ielendı.

Qolaǧa qol jetkızdı

Dodanyŋ üşınşı künı äielder arasyndaǧy 69 kelı salmaqta Qa­zaqstan namysyn Gülnäz Naury­zova qorǧady. Qazaqstannyŋ chempiony jalpy esepte 218 kelılık zıltemırdı köterıp, besınşı orynǧa ornyqty. Bırınşı jäne ekınşı oryndy soltüstık koreialyqtar Rio Un Hu men Rim En Sim aldy. Üşınşı därejeden qytailyq Iý Iýn körındı.

Erler arasynda 85 kelı salmaqta synǧa tüsken Evgenii Evstafev pen Erbol Meiırmanovtarǧa da el ümıt artqan bolatyn. Evgenii jalpy esepte 341 kelılık zıltemırdı ba­ǧyndyryp, Aziia chempionatynyŋ qola jüldesın ielendı. Al Erbol, ökınışke qarai, biıkten körıne almady. Būl salmaqta bırınşı oryndy İran auyr atletşısı Surab Moradi alsa (358 kg), ekınşı orynnan irak sportşysy Äl-Djumaili Safa (351 kg) körındı.

Aziia bırınşılıgı bügın aiaqtalady.

Erbol JANAT