Kölık jürgızuşılerge balalardyŋ da aitary bar. Elordalyq jetkınşekter özderınıŋ jürekjardy ūsynys-tılekterın suretter arqyly beineleptı. Mūndai airyqşa şarany Astana qalasynyŋ IID Jergılıktı polisiia qyzmetı ūiymdastyrdy.
Jaiau jürgınşılerdıŋ ışınde eŋ beiqamy – balalar. Olar apat aiaq astynda dep oilamaidy. Aldy-artyna qaramai, jolǧa da jügırıp şyǧuy mümkın. Psihologtardyŋ aituynşa, balalar közınıŋ aldyndaǧyn ǧana köredı eken. Sondyqtan olardy jol apatynan saqtandyru – ata-ananyŋ ǧana emes, jol polisiialardyŋ da mındetı. Astana qalasy Işkı ıster departamentı Jergılıktı polisiia qyzmetı balalar arasyndaǧy jol-kölık oqiǧalarynan jaraqat aludy azaitu maqsatynda «Jürgızuşı, jol tärtıbın saqta!» atty suret saludan saiys ötkızdı. Balaqailardyŋ salǧan suretterı adam aiaǧy köp jüretın aialdamalarda, mektepterdıŋ maŋaiyna, qoǧamdyq oryndarǧa ılındı.
Konkursqa elordalyq 95 mekteptıŋ bastauyş synyp oquşylary qatysty. Saiysqa qatysuşylar özın jolda qalai ūstau kerektıgın, jürgızuşıler eŋ aldymen nege män beru kerektıgın şaǧyn tuyndylarynda körsetken. Qiialmen beinelengen suretterdıŋ ışınde №70 mektep-gimnaziiasynyŋ 4 «ä» synyp oquşysy Elaman Şülembaidyŋ suretı üzdık dep tanylyp, ol bırınşı oryndy jeŋıp aldy. Ekınşı oryn №32 mektep-gimnaziiasynyŋ 3 «e» synyp oquşysy Ruslan Kardaşqa berılse, üşınşı oryn №82 mamandandyrylǧan «Daryn» liseiın 3 «ä» synyp oquşysy Asylai Jeŋısbekke būiyrdy.
Sonymen qatar, «Jürgızuşıge arnalǧan eŋ jaqsy ötınış!» nominasiiasynda №54 mektep-liseiınıŋ 4 «b» synyp oquşysy Mansūr Madethanūly, «Maŋyzdy jol belgılerı» nominasiiasynda №41 orta mektebınıŋ 2-synyp oquşysy Äigerım Serıkbaeva, «Erekşelıgı üşın» atty nominasiiasynda №67 mektep-gimnaziiasynyŋ 4 «e» synyp oquşysy Diliara Jeŋısqyzy jeŋımpaz atandy.
Saiystaǧy «Eŋ jas qatysuşy» nominasiiasy №33 mektep-balabaqşasynyŋ «0» synyp oquşysy Denis Sibilskiige būiyrdy.
Endı būl suretter Astana aialdamalarynda ılınetın bolady.
Kışkentai suretşılerdı qūttyqtaǧan Astana qalasynyŋ IID Jergılıktı polisiia qyzmetınıŋ bastyǧy Baqytjan Malybaev «jūrtşylyqtyŋ bärı jürgızuşı emes, bıraq ärbır adam – jaiau jürgınşı. Sondyqtan jol jüru erejelerın balalardyŋ sanasyna jastaiynan sıŋıre beru qajet. Būl olardy jolda bolatyn ärtürlı apattardan saqtaidy» dei kele, jürgızuşılerdı jolda abai boluǧa şaqyrdy.
Qymbat TOQTAMŪRAT
