ТЕАТР КҮНІН ТОЙЛАДЫ
Кеше Бейбітшілік және келісім сарайында Халықаралық театр күніне орай мерекелік концерт өткізіліп, шара барысында қаланың өнер майталмандарына құрмет көрсетілді.
Осы айтулы күнге байланысты театр өнерпаздарына қала әкімі Иманғали Тасмағамбетов арнайы құттықтау жолдады. «Өнер саласының ішінде театрдың алар орны қашанда бөлек. Көрермен көңілін нұрға, жүрегін жырға бөлейтін де, қоғамның рухына дем, ішкі жан дүниелеріне ем беретін де – театр өнері. Ендеше, елорда халқының талғамын тәрбиелеп, рухани байыта түсуге қызмет етіп келе жатқан Астана қаласының театр ұжымдарына еңбектеріңіз жана берсін демекпін» делінген Астана әкімінің құттықтау сөзінде.
Сонымен қатар, мерекелік концерт барысында Астана қаласында театр өнерінің дамуына сүбелі үлестерін қосып келе жатқан бірқатар актерлер мен ұжым жетекшілеріне елорда әкімінің алғыс хаттары табыс етілді.
Жолаушылар жеңілдікпен жүреді
2013 жылдың 1 сәуірінен бастап «Жолаушылар тасымалы» АҚ жайлы да ыңғайлы «Тальго» жолаушылар пойыздарының «Гранд» және «Бизнес» класы вагондарына 20% жеңілдіктер енгізеді.
Жеңілдіктер №1/2 «Алматы–Астана» – «Тұлпар», 151/152 «Алматы–Петропавл» – «Жетісу» жолаушылар пойыздарына, сондай-ақ №87/88 «Ақтөбе–Астана»–«Ақтөбе» пойызының «Турист» вагонында жол жүруге қарастырылған.
Астана әкімдігінің сайты жаңарды
Жыл басы – наурыздан бастап Астана қаласы әкімдігінің интернет-ресурсы жаңа қалыпқа көшті. Сайтты жасаушылардың жетекшісі Талғат Серікұлының айтуынша, әкімдіктің бұл жолғы веб-өкілдігі фунционалдық тұрғыдан тұрғындарға да, халыққа да ыңғайлы.
Мәселен, «Халықтық бақылау» қызметіне тұрғындар енді арыз-шағымдарын жазбаша түсіріп қана қоймай, мәселеге қатысты фотоайғақ қосып, тіпті «Яндекс карта» арқылы мекен жайын да көрсете алады. Сайт әкімшісі оны бірден құзіретті органға жөнелтеді. Жауапты мекеменің өкілі мәселені қанша күнде шешетінін белгілейді, орындалғасын қайтадан суретке түсіріп, нәтижесін жариялайды. Мұның бәрінен арыз, өтініш иесі пошта арқылы хабардар етіліп отырмақ. Ең соңында өтініш иесі сайтқа кіріп, «қаншалықты тез жауап қатты?», «қаншалықты тез орындады?», «қаншалықты сапалы орындады?» деген үш талап бойынша бағасын береді. Егер өтініш, арыз еленбесе, тұсына қызыл индикатор қойылады. Ал статистикасы қала әкімінің назарына ұсынылып отырады. Фотоға түсіретіндей жағдай болмаса, әлде ондайға сұранып тұрмаған мәселе болса, балама ретінде «Виртуальды қабылдау бөлмесі» атты айдар бар. Онда тұрғындар түрлі тұрмыс түйткілдеріне қатысты мәселелерін жаза алады. Ал тұрғын үй, әлеуметтік нысандар құрылысы, жер, коммуналдық қызметтер сынды көпшілікті мазалайтын, жиі қойылатын ортақ сауалдардың жауабы сайтта дайын күйінде тұрады. Сайттың тағы бір жаңалығы – тіркелген қолданушы қаласа, ауа райының жайсыздығына орай қаладан шығатын күре жолдардың жабылуы туралы, жол жөндеу учаскелері туралы, мектептерде сабақтың болатын-болмайтындығы туралы, күнделікті мәдени-көпшілік шаралар туралы электронды поштасына ақпарат алып отыра алады.
Еркежан СӘТІМБЕК
