«Нұр Отан» партиясы төрағасының бірінші орынбасары Мәулен Әшімбаевтің Жазушылар одағының төрағасы Ұлықбек Есдәулет бастаған қаламгерлер қауымымен кездесуінде бірлесіп атқаратын істер талқыланып, партия мен аталмыш ұйым арасында өзара ынтымақтастықты нығайту жөнінде меморандумға қол қойылды.
«Нұр Отан» партиясы алда жас ақын-жазушыларды ынталандыру мақсатында «Рухани жаңғыру» бағдарламасы аясында әдеби байқау өткізбек. Соның нәтижесінде 5 аталым бойынша 15 қатысушыға жүлде тапсыру көзделіп отыр. Сондай-ақ Жазушылар одағымен бірлесіп «Астана» телеарнасынан көрсетілетін арнайы телебағдарлама дайындау ісі қолға алынбақ. Бұл тележоба форматы мен мазмұны жағынан ақын-жазушылардың заманға лайық жаңа мінбері болмақ.
Үшінші жоба – YouTube-те арнайы канал ашып, көрермендерге идеологиялық, тәрбиелік сипаттағы көркем дүниелер ұсыну. Ал төртінші жоба – партиялық бастамалар аясында қайта жаңғыртылған кітапханаларда ақын-жазушылармен кездесулер, түрлі шығармашылық кештер өткізетін арнайы клубтар құру.
«Бұл жобалардың барлығын жас ақын-жазушыларымызға беріліп отырған мол мүмкіндік деп есептейміз. Сондықтан осы мүмкіндікті тиімді пайдаланып, алға қойған мақсаттарымызға жету үшін бірлесіп жұмыс істейік» деді М.Әшімбаев.
