Шығармашылықта шекара жоқ
Жастар сарайында «Шекарасыз шығармашылық» атты мүмкіндігі шектеулі адамдарға арналған фестивальдің гала-концерті мен марапаттау рәсімі өтті. «Хореография», «вокал» және «ымдау тілінде ән орындау» аталымдары бойынша ұйымдастырылған фестивальге бастапқыда жиырма жеті адам қатысты. Іріктеле келе, екінші кезеңге жиырма үш дарын өтіп, финалда өнер көрсетті.
Аталмыш фестивальдің осыдан төрт жыл бұрын бастау алуына Астана қаласы Мәдениет, мұрағат және құжаттама басқармасының басшысы Болат Мажағұлов бастамашыл болды. Бұл бастаманы көпшілік қолдап, содан бері жыл сайын үзілмей елордада өтіп келеді. Қазіргі таңда бұған қатысушылардың қатары да артуда. Мәселен, өткен жылы сайыскерлердің басым бөлігі Астанадан болса, биыл ел өңірлерінен келген дарындар көп. Мұны Зағиптар қоғамының төрағасы Қуантай Тәкенов айтады.
Сонымен, «хореография» аталымында Петропавлдан келген Евгений Кузьмин мен Яна Дружкова жұбы «Ча-ча-ча» биімен көпшіліктің көңілінен шығып, екінші орынды иеленді. Ал, бас жүлде корей биін билеген батыс қазақстандық Жалғас Жанатқа бұйырды.
«Вокал» аталымында астаналық Халида Нефедова үшінші орынды, қарағандылық Арман Қарынсау екінші орынды алса, Ақниет Алтынбек пен Жанар Әділбекова бірінші орынды бөлісті.
Өз биімен үздік көрінген Жалғас Жанаттың «ымдау тілінде ән орындау» аталымында да өнері көрініп, оған
үшінші орын берілді. Мұнда екінші орыннан астаналық Ерхан Төлеубеков пен Гүлраушан Жоханшаның өнері көрінді. Ал бірінші орынды петропавлдық Айнұр Сайынова жеңіп алды.
Қызылжардан келген «Sensative» тобы фестивальдің бас жүлдесін солтүстікке алып кетті. Оларды қазылар алқасының төрағасы Хасан Исраилов марапаттады. Аталған игі шараны ұйымдастырушыларға алғыс айтқан ол барлық қатысушыларға шығармашылық табыстар тіледі.
«Sensative» тобы жайлы аз-кем айта кетейік. Топ мүшелерін Петропавл қаласындағы есту қабілеті нашар балаларға арналған мектеп-интернатта жұмыс істейтін Ольга Ростовщикова өнерге баулыған. Бұдан бұрын топтағы балалар Италияда өткен халықаралық байқауда топ жарған. Сондай-ақ, Болгария мен Ресейде өткен фестивальдерге қатысқан. Биыл топ Барселонада өтетін «Испания аспаны астында» атты би фестиваліне қатыспақ. «Онда бар өнерімізді саламыз» дейді балалар.
«Өнерлі өрге жүзер» дейді дана халқымыз. Фестивальге қатысқан барша дарындарға өнер көгінде самғауды тілейміз.
А. Қалжанов