Астанадағы Ұлттық академиялық кітапханада көрнекті ғалым, мемлекет және қоғам қайраткері Мырзатай Жолдасбековтің коллекциясынан құралған «Тұлға бар да, кітап бар» атты көрме өтті. Көрмеге тұлғаның мемлекеттік марапаттары, оған сыйға берілген кітаптар мен өзінің соңғы жылдары жарық көрген еңбектері қойылды.
Осыдан төрт жыл бұрын ғалым өмір бойы жинаған 10 мыңнан астам кітабын аталмыш кітапханаға сыйға тартқан еді. Сонда ашылған «Мырзатай Жолдасбековтің мемориалдық кітап коллекциясы» залын бұл жолы жаңа еңбектері толықтырды. Бұған қоса, көрмеге келгендер әр жылдары алған 79 медалі мен төрт орденін көрді.
Мәдениет және спорт министрлігінің жауапты хатшысы Қуатжан Уәлиев, белгілі ғалым Ғарифолла Есім, жазушы Болат Бодаубай коллекция иесіне жылы лебіздерін жеткізді. Қатимолла Бердіғалиев, Айгүл Үлкенбаева, Ұлжан Байбосынова сынды өнер саңлақтары жыр-термеден шашу шашты.
