«ЖАЙДАРМАН» АЛАҢЫНДА – ЖАС МАМАНДАР
Астана қаласы әкімдігі Тілдерді дамыту басқармасының ұйымдастыруымен ҚР Тәуелсіздігінің 25 жылдығына арналған «Мемлекеттік тіл – барлық салада» атты жас мамандардың арасындағы «Жайдарман» ойындары өтті.
Бұл сынның басты ерекшелігі ойынға кәсіби «жайдарманшылар» емес, әртүрлі салада қызмет етіп жүрген жас мамандардың қатысуы болса керек.
Мемлекеттік тілдің мерейін көтеруге арналған «Жайдарман» ойындарына 11 команда қатысып, өз өнерлерін ортаға салды. Олардың ішінде Астана қаласы әкімдігі Білім басқармасы, Сарыарқа ауданы әкімдігі мен Астана қалалық Дін істері басқармасы, «KEGOC» және «Транстелеком» АҚ құрама командалары бар. Мемлекеттік қызметшілер мен акционерлік қоғамның жас мамандары көрерменге көтеріңкі көңіл-күй сыйлай білді. Сондай-ақ, әзіл кешіне С.Сейфуллин атындағы Қазақ агротехникалық университеті, Қазақ экономика қаржы және халықаралық сауда университеті, Астана қаласы көлік және коммуникация колледжі мен АСУ колледжінің ұстаздары қатысып, өз шәкірттерін күлкіге қарқ қылды.
Ойын басталмай тұрып көрермен «Жайдарманға» қатыспаған жас мамандар сахнада қалай өнер көрсетер екен?» деп күдіктенген болатын. Тіпті, мұндай күдіктің болғанын көрерменнен бұрын Қазақстан КВН одағының президенті Есен Елеукеннің өзі тілге тиек етті. Алайда 11 команданың ішінде өнерімен жұртшылықты тәнті еткен де, сонымен қатар «әттеген-ай» дегізген де құрамалар болды. Десек те, жас мамандардың астарлы әзілдері кейбір кемшіліктерді жуып-шайып кеткендей болды. Бұдан бөлек, көрермен мен қазылар алқасын «жайдарманшылардың» саяси әзіл айта білген қасиеті тамсандырды. Себебі «қазақ көңілді тапқырлар клубы саяси әзілдер айтпайды» деген қоғамда сыни көзқарас бар болатын.
Сонымен, қазылар алқасының шешімі бойынша Астана қаласы көлік және коммуникация колледжі «Жайдарман» сайысында ең үздік өнер көрсеткені үшін «Үздік ойыншы» номинациясын иеленді. Сондай-ақ, үшінші орынды Сарыарқа ауданы әкімдігі мен Астана қалалық Дін істері басқармасының бірлескен құрамасы місе тұтса, екінші орынды Қарағанды қаласының жас мамандары олжалап кетті.
Ал бас жүлде мен кубокты «Қазақстан» Республикалық телерадиокорпорациясы» акционерлік қоғамының атынан қатысқан «Төртінші билік» командасы жеңіп алды.
Серік ҚҰДАЙБЕРГЕНҰЛЫ