ЖАҢАШЫЛ ПЕДАГОГТІҢ ЖЕТІСТІГІ
Биылғы «Жыл мұғалімі-2016» қалалық байқауында елордадағы дарынды балаларға арналған №9 «Зерде» мектебінің биология пәні мұғалімі Ләзім Қасымова жеңімпаз атанды.
Ол жас күнінен ұлағатты ұстаз болуды армандапты. Оған мектепте оқып жүргенде сынып жетекшісі, география пәнінен сабақ берген Айтжан Уәлиеваның әсері мол болыпты. Өзі де түр-тұлғасы келісті, сымбатты кісі екен. Әр сабақты өзгеше өткізіп, балалардың шынайы бағбанына айналған. Соның бәрі сүйікті оқушысының арманын әлдилепті. Биікке самғауға қанаттандырыпты. Ләзімнің туған апалары да педагогтік жолды қалаған майталман мұғалімдер саналады.
Біздің кейіпкеріміз бала кезінен әкесінің ерке қызы атаныпты. Оны папасы басқалардан ерекше жақсы көргені сондай, бетінен қақпай өсірген. «Айналайын, сенің қолыңнан бәрі келеді. Сен үлкен ғалым боласың. Ол үшін сабақты жақсы оқып, үлгілі адам болу керек!» деп демеу беріп қояды екен. Амал нешік, оған қызының жетістігін көруді жазбапты.
Сәбит Мұқанов, Ғабит Мүсірепов секілді әдебиет алыптары дүниеге келген Қызылжар өлкесінде өмір есігін ашқан ол Шоқан Уәлиханов атындағы Көкшетау педагогикалық университетін тәмамдайды. Одан кейін туған ауылында еңбек жолын бастайды. Білімі молайып, тәжірибесі жетіле түседі. 2007 жылы отбасымен Астанаға қоныс аударады. Содан бері қаладағы дарынды балаларға арналған №9 «Зерде» мектебінде жұмыс істейді. Бас қалаға келгеннен кейін жас ұстаздың білім жолы кеңейеді.
Мектептегі жұмысымен қатар, 2012-2014 жылдар аралығында Л.Гумилев атындағы Еуразия ұлттық университеті жаратылыстану факультетінің магистратурасын бітіреді. Чехия мемлекетінің Прага қаласындағы Богема орталық университетінде халықаралық тағылымдамадан өтеді. Ғылыми диссертациясын жоғары деңгейде қорғап, педагогика ғылымдарының магистрі атағын алады. 2013 жылы биология пәні бойынша мұғалімдерге арналған республикалық қашықтық олимпиадасының бірінші орын иегері атанады. Осы марапатты ол қатарынан екі рет иеленеді.
– «Жыл мұғалімі-2016» қалалық байқауының бас жүлдесін алғанда қатты толқыдым. Қуаныштан көзіме жас келді. Әрине, бұл – бір жағынан жалғыз менің ғана еңбегім емес. Оған мектеп ұжымы мен оқушылар және ата-аналар да себепкер болды. Әсіресе, «Зерде» мектебінің алғашқы директоры Айтжан Шаяхметованың талабы мен шығармашылық жұмыс жасауға бағыттауы маған серпіліс берді. Оқушыларды түрлі зияткерлік сайыстарға дайындау кезінде өзім де олармен бірге өстім. Одан кейін екінші директор болған Құралай Амангелдіқызы мені білімдегі жаңа инновациялық идеяларымен сабақ берудің жаңашыл тəсілдерін меңгеруге машықтандырды. Бүгінгі мектеп басшысы Әлия Сексенованың істеген жұмысыңды бағалауына ерекше разымын. Осы ыстық ықыластың барлығы маған қолдау болды, – дейді дарынды педагог.
Әрине, кез келген ұстаз өз шәкіртімен биік көрінеді. Оның республикалық, қалалық олимпиадаларда оза шауып жүрген талантты шәкірттері көп. Білім сайыстарында биология пәні бойынша бірнеше рет қатарынан жеңімпаз болған оқушылар бар. Соның барлығы жаңашыл педагогтің жаңа өріс іздей білетін ізденімпаздығы деп айтуға болады.
Оны бүгінгі ұстаздардың жанкешті жұмысы да алаңдатады. «Педагогтердің ауыр еңбегі бағаланса екен деп ойлаймын. Қаншама ұстаз шəкірттерге білім беріп, еліміздің болашағын тəрбиелеп келеді. Қазіргі таңда мұғалімнің мəртебесі қатты қынжылтады. Ата-аналар да баласының болашағына үлес қосып жатқан ұстаздарға сыйластықпен, түсіністікпен қараса!» деп салмақты ой өрбітеді.
Айтпақшы, Ләзім Қасымова – үздік педагог қана емес, төрт бала тәрбиелеп отырған асыл ана.
Азамат ЕСЕНЖОЛ