Жеделсөз
2015 жылдан бастап Қазақстанда мектептер 12 жылдық білім беруге көшеді. Бұл туралы Тамыз конференциясы аясында өткен арнайы секцияда 12 жылдық білім берудің жалпыға міндетті мемлекеттік стандартын әзірлеуші мамандардың бірі, Ыбырай Алтынсарин атындағы Ұлттық білім академиясының вице-президенті Әділхан Дүйсебек мәлім етті.
– 12 жылдық білім беру бойынша тәжірибе қашан енгізілді?
– Биыл елордадағы 8 мектептің 12 жылдық білім беру үлгісін енгізу тәжірибесіне қатысқанына 10 жыл болды. Тәжірибеге №18, 38, «Көгілдір желкен», №3, 4, 35, 16, 32 мектептің 123 оқушысы мен 147 мұғалімі қатысты.
– Жаңа стандарт бойынша бала неше жастан сабаққа барады?
– Бала 6 жастан бастап мектепке барады. Бескүндік оқу бағдарламасына сәйкес, оқушыға баға қою қарастырылмаған. Сабақтың ұзақтығы 35 минут болмақ. Ал, 2-3 сыныпта олар шет тілдерін оқи бастайды.
– Басқа пәндер енгізіле ме?
– 5-ші класс «өтпелі сынып» болып саналады. Себебі, осы кезде баланың бейімділігі анықталады. Сол сыныпта «Қазақ елі» пәні де енгізіледі. Бұл пән 8-ші сыныпқа дейін жалғасады. 9-10-сыныптарда «Мамандық әлеміне кіріспе» атты жаңа пәннің негізінде бейіндік білім беру жүргізіледі. Ал 11-12 сыныптарда бұрынғы оқу-өндірістік комбинаттардың тәжірибесі негізінде оқушыларға нақты бір маманның куәлігі беріледі. Осылайша,
біз мектеп қабырғасында біраз жұмысты бітіріп, университетте оған уақыттың шығындалуына жол бермейміз. Жоғары оқу орнында мектеп түлегі нақты мамандық бойынша
білім алуы тиіс.
Еркежан СӘТІМБЕК
