ەلدى ساياسي جاڭعىرتۋداعى ازاماتتىق قوعامنىڭ ءرولى قانداي؟ كەشە استانا قالاسى اكىمدىگى جانىنداعى ۇەۇ-مەن ءوزارا ءىس-قيمىل جانە ىنتىماقتاستىق جونىندەگى كونسۋلتاتيۆتىك كەڭەستىڭ وتىرىسى وسى تاقىرىپقا ارنالدى. جيىنعا ۇكىمەتتىك ەمەس ۇيىمدار مەن ەلوردانىڭ ازاماتتىق سەكتورىنىڭ, قوعامدىق بىرلەستىكتەردىڭ كوشباسشىلارى, كونسۋلتاتيۆتىك كەڭەس مۇشەلەرى, استانانىڭ بەلسەندى جاستار ۇيىمدارى وكىلدەرى قاتىستى.
ءىس-شارانى قالالىق ىشكى ساياسات باسقارماسىنىڭ قولداۋىمەن «ازاماتتىق باستامالار ورتالىعى» قىزمەتىنىڭ اياسىندا «كامەدا» قوعامدىق قورى ۇيىمداستىردى. وتىرىسقا توراعالىق ەتكەن استانا قالالىق ىشكى ساياسات باسقارماسىنىڭ باستىعى داۋرەن بابامۇراتوۆ اتالعان كەڭەستەگى ۇەۇ-داردىڭ الەۋەتىن جوعارى باعالايتىنىن جەتكىزدى. سونىمەن قاتار ەلىمىز بويىنشا ەڭ مىقتى ۆولونتەرلىك قۇرام استانادا ەكەنىن اتاپ وتكەن ول الداعى ۋاقىتتا كەڭەس قۇرامىندا جاستاردىڭ, سونىڭ ىشىندە ۆولونتەرلىك ۇيىمداردىڭ دا كوبەيۋىنە قولداۋ بىلدىرىلەتىنىن ايتتى.
استانا قالالىق ازاماتتىق باستامالار ورتالىعىنىڭ باسشىسى, «كامەدا» قوعامدىق قورىنىڭ, «اليانس ۇەۇ» زتب ديرەكتورى ماحاببات ەسپەنوۆا «ەلدى ساياسي تۇرعىدا ءتيىمدى جاڭعىرتۋ ءۇشىن ازاماتتىق قوعام ينستيتۋتتارىنىڭ مەملەكەتتىك ورگاندارمەن ءوزارا ءىس-قيمىلىنداعى جاڭا تاسىلدەر» تاقىرىبىندا بايانداما جاسادى.
– ەلوردادا مەملەكەتتىك قۇرىلىمدار مەن كوممەرتسيالىق ەمەس ۇيىمداردىڭ ءوزارا ءىس-قيمىلى ءۇش ۆەكتور بويىنشا دامىعان. سونىڭ ءبىرى – مەملەكەتتىك ساياسات قۇرۋ. ءماسليحاتتا قازىرگى تاڭدا ۇەۇ-نان تەك 3 وكىلىمىز بار. بۇل تىم از. ەلوردادا كونسۋلتاتيۆتىك كەڭەس ورگاندارىنىڭ سانى – 21. سونىمەن قاتار ۆەدومستۆوارالىق جۇمىس توپتارى بويىنشا 11 ۇەۇ جۇمىس ىستەيدى, – دەگەن ول ەلوردادا قازىرگى تاڭدا مەملەكەتتىك الەۋمەتتىك تاپسىرىس بويىنشا بارلىق سالالار قامتىلماي وتىرعانىن مالىمدەدى. وسى باعىتتا بەلسەندى جۇمىس ىستەمەيتىن باسقارمالار مەن دەپارتامەنتتەردى سىنعا الدى. ونىڭ ايتۋىنشا, بۇگىنگى تاڭدا مەملەكەتتىك قىزمەتكەرلەر مەن ۇكىمەتتىك ەمەس ۇيىمداردىڭ 40 پايىزدان استامى مەملەكەتتىك الەۋمەتتىك تاپسىرىسقا قاتىستى قۇقىقتىق-نورماتيۆتىك اكتىلەردى بىلمەيدى نەمەسە ولاردىڭ ورىندالۋىن ساقتامايدى. قالادا سينتەتيكالىق ەسىرتكىمەن كۇرەس, قالا تۇرعىندارىنىڭ مادەني كودىن قالىپتاستىرۋ ماسەلەلەرى دە م.ەسپەنوۆانىڭ بايانداماسىندا كوتەرىلىپ, د.بابامۇراتوۆ وسىعان وراي جاسالىپ جاتقان جۇمىستار تۋرالى باياندادى.
استانا قالالىق جاستار ساياساتى جونىندەگى باسقارمانىڭ ءبولىم باسشىسى ايان ەرمەنتاەۆتىڭ ايتۋىنشا, قالادا قازىرگى تاڭدا 50-گە جۋىق جاستار ۇيىمدارى باسقارمامەن بىرگە جۇمىس ىستەيدى.
– باسقارما 12 مەملەكەتتىك تاپسىرىس بويىنشا جۇمىس جۇرگىزۋدە. قازىرگى تاڭدا قالا اكىمدىگىنىڭ قولداۋىمەن «جاسىل ەل» جوباسى ارقىلى بيىل 4200 جاستى جۇمىسپەن قامتۋ جوسپارلانىپ وتىر. سونىڭ ىشىندە 1639 بالا جۇمىسقا تۇرعىزىلدى. نەگىزگى باسىمدىق الەۋمەتتىك از قامتىلعان وتباسىلاردان شىققان 14-29 جاس ارالىعىنداعى جاستارعا بەرىلەدى. ودان بولەك, اتا-انا قامقورلىعىنسىز قالعان 500 جەتىم بالاعا ارنالعان التى ايلىق باعدارلامالار دا جۇرگىزىلىپ جاتىر. ۆولونتەرلىك باعىتتارعا كەلسەك, بىرنەشە سالادا جۇمىس جۇرگىزىلەدى, ەڭ كىشى ۆولونتەرىمىز 6 جاستا بولسا, ەڭ ۇلكەنى – 82 جاستاعى اجەمىز. ول اجە بىلتىر كارانتين كەزىندە بىزگە ماسكا تىگىپ بەرگەن, – دەپ ا.ەرمەنتاەۆ قالاداعى جاستار ساياساتى باعىتىنداعى جۇمىستارعا توقتالدى
