مەملەكەت باسشىسى قاسىم-جومارت توقاەۆتىڭ الداعى پرەزيدەنت جانە پارلامەنت سايلاۋلارى وتەتىنى تۋرالى ءوز جولداۋىندا جاريا ەتكەننەن كەيىن قوعامدا وسى ساياسي وقيعالار قىزۋ تالقىلاۋعا ءتۇسىپ جاتىر.
حالىق بۇل ساياسي شارالار «جاڭا قازاقستاننىڭ» ايقىندالعان باعىت-باعدارىنا تىڭ سەرپىن بەرەتىنىنە سەنىم ارتىپ وتىر.
مەن دە وسى ەلىمنىڭ ازاماتى رەتىندە بالالارىمنىڭ كەلەشەگى ءۇشىن ءوز تاڭداۋىمدى جاسايتىنىم ءسوزسىز. بۇل ساياسي ناۋقانعا جەڭىل-جەلپى قاراۋعا بولمايدى, ويتكەنى مەملەكەتتىڭ كەلەشەگى بارشا قازاقستاندىقتاردىڭ تاڭداۋىنا بايلانىستى بولاتىنى انىق. سوندىقتان كونستيتۋتسيالىق رەفورمانىڭ ىسكە اسۋىنىڭ ارقاسىندا سايلاۋ ناۋقانى دا بارلىق زاڭ تالاپتارىن ساقتاي وتىرىپ جۇرگىزىلەتىنىنە سەنىممەن قارايمىن.
سوڭعى جىلدارداعى وزگەرىستەر مەن كونستيتۋتسيالىق رەفورما مەملەكەتتىڭ ساياسي قۇرىلىمىنىڭ جاڭا ۇلگىسىن قالىپتاستىرىپ وتىر. ءوز باسىم ەلدەگى ساياسي جۇيەنى وزگەرتۋدىڭ ءمان-ماڭىزىن جاقسى تۇسىنەمىن.
پرەزيدەنتتىڭ حالىققا جولداۋىندا ايتىلعان ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزىن بالالاردىڭ ارناۋلى جيناقتاۋشى ەسەپشوتىنا اۋدارۋدى ۇسىنۋى ەل اراسىندا قىزۋ قولداۋ تاپقانى ءسوزسىز. ولاي دەيتىنىم, ءاربىر بالانىڭ شوتىنا تۇسكەن قاراجات, ەلدىگىمىزدىڭ بولاشاعىنا سالىنىپ جاتقان قۇندى كاپيتال, وسكەلەڭ ۇرپاقتىڭ ۇلكەن ومىرگە قادام باسۋىنا مۇمكىندىك بەرەتىن يگىلىك دەپ بىلەمىن. سونداي-اق الداعى جىلى 100 مىڭ جاستى جۇمىسقا ورنالاستىرۋ, جاستاردىڭ كاسىپكەرلىك باستامالارىنا قولداۋ كورسەتۋدى جالعاستىرۋ دا الەۋمەتتىك وزەكتى ماسەلە سانالادى. وسىنىڭ ءبارى اينالىپ كەلگەندە, ساياسي رەفورمالاردىڭ جۇزەگە اسىرىلۋىمەن استاسىپ جاتىر.
بىلە بىلسەك, مەملەكەت باسشىسى بۇكىل ساياسي جۇيەنى وزگەرتۋدى وزىنەن باستاپ وتىر. ياعني, مەملەكەتتىك قۇرىلىمداعى رەفورمالار جاڭا ەرەجەلەر بويىنشا جۇرگىزىلەدى.
تۇپتەپ ايتقاندا, بۇل سايلاۋ – ەلىمىزدە جۇرگىزىلىپ جاتقان ساياسي رەفورمالاردى ءىس جۇزىندە جۇزەگە اسىرۋ باستاماسى بولىپ تابىلادى. سوندىقتان دا وتانداستارىمدى پرەزيدەنت سايلاۋىنا بەلسەندى قاتىسۋعا شاقىرامىن. ەلىمىزدىڭ كەلەشەگى ءوزىمىزدىڭ قولىمىزدا ەكەنىن تەرەڭ تۇسىنۋگە ءتيىسپىز دەپ ايتقىم كەلەدى.
سەمبەك قابيەۆ,
استانا قالاسىنىڭ «اۋعانستان سوعىسى مۇگەدەكتەرى مەن ارداگەرلەرى وداعى» قوعامدىق بىرلەستىگى باسقارماسىنىڭ مۇشەسى
