بۇل ءبىر كەزدە كوپەس يۆان ۆتوروۆ دەگەننىڭ جەكەجايى (وسوبنياگى) بولعان. ءوز زامانىنىڭ بىرەگەي تۋىندىسى بولىپ سانالاتىن ەكى قاباتتى ۇيدەن ساۋلەت ونەرىنىڭ ەرەكشە بەلگىلەرى بايقالادى.
لەنين داڭعىلى (قازىرگى اباي داڭعىلى) مەن كومسومولسكايا (قازىرگى جەلتوقسان) كوشەسى قيىلىسىنداعى وسى عيماراتتا كەڭەس كەزەڭىندە قالالىق اۋرۋحانانىڭ حيرۋرگيا بولىمشەسى جۇمىس ىستەپتى. كەيىن, دالىرەك ايتقاندا, 1971 جىلى بۇل تاريحي عيمارات ءسۇرىلىپ, ورنىنا كوپ قاباتتى تۇرعىن ۇيلەر سالىنعان.
«ۆتوروۆ ءۇيى الىستان كوز تارتاتىن سول كەزدەگى ايىرىقشا قۇرىلىس بولدى. ءبىرىنشى قاباتى ءتۇرلى ويۋ-ورنەكتەرمەن اسەمدەلىپ, ەكىنشى قاباتىنىڭ سىرتى ۇنەمى ارلەنىپ, جاڭارتىلىپ وتىراتىن. بۇل عيماراتتى بۇزباي تاريحي ەسكەرتكىش رەتىندە قالدىرۋعا دا بولاتىن ەدى» دەيدى قالانىڭ بايىرعى تۇرعىندارى.
