بوۋلينگتى كوزدى جاۋىپ ويناۋدان تۋرنير ءوتتى

«مۇگەدەك جاستار قوعامى» ۇيىمى مەن استانا قالاسى كاسىپكەرلەرىنىڭ ۇيىمداستىرۋىمەن بوۋلينگتى كوزدى جاۋىپ ويناۋدان تۋرنير ءوتتى, دەپ حابارلايدى astana-akshamy.kz. 

بوۋلينگ ويناۋ ەشكىمدى تاڭعالدىرا قويمايدى. ال بوۋلينگتى كوزدى جاۋىپ ويناۋ اركىمنىڭ قولىنان كەلە بەرمەيدى. وسى ورايدا «دۋمان» قوناق ۇيىندە استانا قالاسىنىڭ كاسىپكەرلەرىنەن جاساقتالعان 5 كوماندا ەرەكشە سايىستا سىنعا ءتۇستى.

«ادامدا 5 سەزىم مۇشەسى بار. ولار: كوز, قۇلاق, ءتىل, مۇرىن, تەرى. ال ولاردىڭ ىشىندە كوزدىڭ جابىق بولۋى ميدىڭ دامۋىنا تىكەلەي اسەر ەتەدى. سوندىقتان دا وسى جارىستى ۇيىمداستىرۋ يدەياسى ويىمىزعا كەلدى.
قازىرگى قوعامدا مۇگەدەكتەر جايلى جاڭساق قاعيدا قالىپتاسقان. كوپشىلىگى مۇگەدەك دەگەندە, ولاردى زەينەتاقى جانە تاماقپەن قامتاماسىز ەتسە, جەتكىلىكتى دەپ ويلايدى. دەگەنمەن, ادام قانداي جاعدايدا بولسا دا, وزگەنىڭ مۇسىركەگەنىن قالامايدى», — دەدى «مۇگەدەك جاستار قوعامى» ۇيىمىنىڭ توراعاسى مۇرات ابدۋمومىنوۆ.

ۇيىمداستىرۋشىلاردىڭ ايتۋىنشا, بۇنداي ءىس-شارا ەكىنشى رەت وتكىزىلۋدە. بۇعان دەيىن 2023 جىلى قازان ايىندا مەملەكەتتىك ورگان قىزمەتكەرلەرى اراسىندا دا وسى جارىس بولعان ەدى.

«مۇگەدەكتەردىڭ جانىن تەك مۇگەدەكتەر ۇعىنادى. ال ساۋ ادامدار دەنساۋلىق پەن وتباسىنىڭ قادىرىن باسقا تۇسپەيىنشە, تۇسىنە بەرمەيدى. سونىڭ انىق دالەلى — پاندەميا ۋاقىتىندا انىق ءبىلىندى. سەن قانشا اقشا تاپساڭ دا, ومىردەگى باستى دۇنيە ەمەس. مىنە بوۋلينگتى كوزدى جاۋىپ ويناۋ ارقىلى ساۋ ادامدار دا وزدەرىنىڭ مۇمكىندىگى شەكسىز ەكەندىگىن دالەلدەگىمىز كەلدى», — دەپ مۇرات ءوز ويىن تۇيىندەدى.

باسەكەنىڭ باسىندا قاتىسۋشىلاردىڭ جىلدامدىعى مەن قارقىنى قاتتى بولعانىمەن, نىسانادان ءمۇلت كەتىپ جاتتى. تەك 10-15 مينۋتتان سوڭ عانا, ولار ويىنعا بەيىمدەلدى.

«بوۋلينگكە بوس ۋاقىتىمدا دوستارىممەن بىرگە بارىپ, وينايمىن. بۇگىنگى ەرەكشە جارىستى ءبىرىنشى رەت ەستىدىم. جاڭا دۇنيە قاشان دا قىزىق قوي. باستاپقىدا شاردى ۇستاۋ قيىن بولعانىمەن, ۋاقىت وتە كەلە كوزگە عانا ەمەس, اينالانى سەزىممەن سەزىنە باستايدى ەكەنسىڭ» — دەپ, الىشەر اتتى قاتىسۋشى ءوز پىكىرىن ءبىلدىردى.

«مۇگەدەك جاستار قوعامى» ۇيىمى الداعى ۋاقىتتا تەك بوۋلينگپەن عانا شەكتەلمەي, كۇز مەزىگىلىندە استانادا ءبىرىنشى رەت جەلكەندى سپورتتان دا شارا وتكىزۋ يدەياسى بار ەكەنىن ايتتى.